مه‌سروور بارزانی: پێناسه‌یه‌ك بۆ عێراقێكی یه‌كگرتوو له‌ئارادا نییه‌

مه‌سروور بارزانى راوێژكارى ئه‌نجوومه‌نى ئاسایشى هه‌رێمى كوردستان رایگه‌یاندووه‌ كه‌ سووننه‌ یان شێعه‌ ئه‌و كاته‌ بڕوایان به‌ عێراقێكى یه‌كگرتوو هه‌یه‌ ئه‌گه‌ر ته‌نها خۆیان حوكمڕان بن بۆیه‌ پێناسه‌یه‌ك ‌بۆ عێراقێكی یه‌كگرتوو له‌ئارادا نییه‌.

رۆژنامه‌ی واشنتۆن پۆست له‌راپۆرتێكیدا له‌نووسینی لیز سلیدا، به‌ناونیشانی چۆن جه‌نگی دژ به‌ده‌وڵه‌تی ئیسلامی دووباره‌ نه‌خشه‌ی رۆژهه‌ڵاتی ناوه‌ڕاست ده‌كێشێته‌وه‌ ئاماژه‌ی به‌لێدوانێكی مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان كردووه‌ كه‌ تێیدا ده‌ڵێت پێویست به‌ بڕیارێكی بوێر هه‌یه‌ بۆ بینینی راستیبه‌كان و رێگه‌دان به‌خه‌ڵك له‌وه‌ى كه‌ بریار بده‌ن چیان ده‌وێت . 

مه‌سروور بارزانى راشیگه‌یاندووه‌ كه‌ عێراق پارچه‌ بووه‌، سونه‌ ئه‌و كاته‌ بڕوایان به‌ عێراقێكی یه‌كگرتوو هه‌یه‌ ته‌نها ئه‌گه‌ر خۆیان حكومڕان بن ، شیعه‌ش ئه‌و كاته‌ بڕوایان به‌ عێراقێكی یه‌كگرتوو هه‌یه‌ ته‌نها ئه‌گه‌ر خۆیان حكومڕان بن ، پێناسه‌یه‌ك ‌بۆ عێراقێكی یه‌كگرتوو له‌ئارادا نییه‌ . 

هه‌روه‌ها گوتوشیه‌تى: هه‌ر هه‌وڵدانێك بۆ پاراستنی وڵات به‌ یه‌كگرتوویی دژ به‌ ویست و ئیراده‌ی خه‌ڵك، سه‌ركه‌وتوو نابێت .

مه‌سروور بارزانی: نابێ ئه‌و ده‌رفه‌ته‌ له‌ ده‌ست بچێت، كه‌ ئه‌گه‌ری دووباره‌بوونه‌وه‌ی ده‌گمه‌نه‌

له‌ په‌یامیدا بۆ سه‌ری ساڵی نوێی زایینی، (مه‌سروور بارزانی) رایگه‌یاند، ئه‌م سه‌ركه‌وتن و پێگه‌یه‌ی ئێستای هه‌رێمی كوردستان له‌ ئاستی جیهانیدا، كه‌ به‌ ئاسانی نه‌هاتووه‌ته‌ دی، له‌ هه‌موو پارت و هێزه‌ سیاسییه‌كانی كوردستان ده‌خوازێ به‌ گیانێكی نه‌ته‌وه‌یی و نیشتمانیانه‌ی دوور له‌‌ ململانێی حزبیانه‌ رووبه‌ڕووی كێشه‌ و ته‌گه‌ره‌ و پێشهاته‌كان ببنه‌وه‌. هاوكات رایگه‌یاندووه‌، هه‌موو ئاماژه‌كان به‌و ئاڕاسته‌یه‌ن، كه‌ به‌پێی پێداویستیی سیاسه‌تی نوێی جیهانی نه‌خشه‌ی ناوچه‌كه‌ داده‌ڕێژدرێته‌وه‌ و، نابێ ئه‌و ده‌رفه‌ته‌ له‌ ده‌ست بچێت، كه‌ ئه‌گه‌ری دووباره‌بوونه‌وه‌ی ده‌گمه‌نه‌.

ده‌قی په‌یامی مه‌سروور بارزانی بۆ سه‌ری ساڵی نوێی زاینی

به‌بۆنه‌ی سه‌ری ساڵی نوێی زاینی، پیرۆزبایی گه‌رمی خۆم ئاراسته‌ی كه‌سوكاری سه‌ربه‌رزی شه‌هیدان و بریندارانی شه‌ڕی‌ دژ به‌ تیرۆریستان و پێشمه‌رگه‌ قاره‌مانه‌كان و سه‌رجه‌م هاووڵاتیانی كوردستان ده‌كه‌م.
یادكردنه‌وه‌ی سه‌ری ساڵی نوێی ئه‌مساڵ له‌كاتێكدا، كه‌ هێزه‌كانی پێشمه‌رگه قاره‌مانانه‌ به‌رگری له‌ خاك و خه‌ڵكی كوردستان ده‌كه‌ن‌ و‌ داستانی مێژوویی گه‌وره‌یان دژ به‌ ده‌وڵه‌تی تیرۆریستی داعش تۆمار كردووه‌، كه‌ نه‌ك ته‌نها‌ بووه‌ته‌ مایه‌ی شانازی بۆ خه‌ڵكی كوردستان، به‌ڵكو ته‌واوی ئازادیخوازانی جیهانیشی سه‌رسام كردووه و له‌ گشت كۆڕ و كۆبوونه‌وه‌ نێوده‌وڵه‌تیه‌كاندا دێته‌ به‌رباس‌. لێره‌وه‌ له‌م بۆنه‌یه‌دا جارێكی دیكه‌ش داوا له‌ كۆمه‌ڵگه‌ی نێوده‌وڵه‌تی ده‌كه‌م پێویسته‌ به‌ په‌له‌تر ئاوڕ له‌ داواكارییه‌كانی پێشمه‌رگه‌ بده‌نه‌وه‌، كه‌ له‌بری هه‌موو جیهان شه‌ڕ ده‌كات.
هاوكات ئه‌م سه‌ركه‌وتن و پێگه‌یه‌ی ئێستای هه‌رێمی كوردستان له‌ ئاستی جیهانیدا، كه‌ به‌ ئاسانی نه‌هاتووه‌ته‌ دی، له‌ هه‌موو پارت و هێزه‌ سیاسییه‌كانی كوردستان ده‌خوازێ به‌ گیانێكی نه‌ته‌وه‌یی و نیشتمانیانه‌ی دوور له‌‌ ململانێی حزبیانه‌ رووبه‌ڕووی كێشه‌ و ته‌گه‌ره‌ و پێشهاته‌كان ببنه‌وه‌، به‌تایبه‌تی هه‌موو ئاماژه‌كان به‌و ئاڕاسته‌یه‌ن، كه‌ به‌پێی پێداویستیی سیاسه‌تی نوێی جیهانی نه‌خشه‌ی ناوچه‌كه‌ داده‌ڕێژدرێته‌وه‌ و، نابێ ئه‌و ده‌رفه‌ته‌ له‌ ده‌ست بچێت، كه‌ ئه‌گه‌ری دووباره‌بوونه‌وه‌ی ده‌گمه‌نه‌.
هه‌ر به‌م بۆنه‌یه‌وه‌ ده‌مه‌وێ سوپاسی خه‌ڵكی خۆڕاگری كوردستان بكه‌م، كه‌ له‌خۆبردووانه‌ شانیان داوه‌ته‌ به‌ر مه‌ینه‌تی و قه‌یرانه‌كان و پێویسته‌ ئیراده‌یه‌كی پته‌ومان هه‌بێت، كه‌ كوردستان سه‌رده‌كه‌وێت و به‌ره‌و ئاینده‌یه‌كی گه‌ش هه‌نگاو ده‌نێین.
دووباره‌ ساڵی نوێ له‌ هه‌موو لایه‌ك پیرۆزبێت و هیوادارم ساڵی نوێ، ساڵی چاره‌سه‌ركردن و كۆتایهاتنی قه‌یرانه‌كان و به‌دیهاتنی  خۆشی و كامه‌رانی بۆ كوردستانیانی خۆشه‌ویست بێت.

 مه‌سروور بارزانی
راوێژكاری ئه‌نجوومه‌نی ئاسایشی هه‌رێمی كوردستان
31/12/2015

مه‌سروور بارزانی: بۆچی هەموو نەتەوەکانی سەرزەوی مافی سەربەخۆییان هەبێ بێجگە لە کورد

مه‌سروور بارزانی بۆ ڕۆژنامه‌ی واڵ‌ ستریت‌ جۆرناڵ ده‌ڵێت، بۆچی دەبێ هەموو نەتەوەکانی سەرزەوەی مافی سەربەخۆیی و خۆبەڕیوەبردنیان هەبێ بێجگە لە کورد؟ کەی ڕەوایە؟ ئایا جیهان وای ده‌وێ؟ تورکەکان و ئێرانییەکان دەوڵەتی خۆیانیان هەیە؛ عەرەبیش 22 دەوڵەتیان هەیە، ئەی کورد بۆ دەوڵەتی خۆی نه‌بێ، ئێمە لەوە زیاتر داوا ناکەین و لەوەیش کەمترمان ناوێ، ئەوەش هەر دێتە پێش و دێتە دی، هەڵبەت پێویست ناکا ئەو مافە بە شەڕکردن بێته‌ دێ.

ئوستووره‌ی داعش شكا
ڕۆژنامه‌ی واڵ‌ ستریت‌ جۆرناڵ له‌ به‌ره‌ی پێشه‌وه‌ی جه‌نگی دژ به‌ داعش له‌ شنگال چاوپیكه‌وتنی له‌گه‌ڵ ڕاوێژكاری ئه‌نجوومه‌نی ئاسایشی هه‌رێمی كوردستان مه‌سروور بارزانی ساز كردووه‌ و له‌ ده‌سپێكیشدا ده‌ڵێ، ئاسان نییه‌ بچیته‌ ئه‌م شوێنه‌ چونكه‌ ڕۆژنامه‌كه‌ به‌ هێڵێ پێشه‌وه‌ی جه‌نگ ناوی دێنێ كه‌ له‌وێدا پێشمه‌رگه‌ توانیویه‌تی پیوه‌ندیی نێوان داعشەکانی ناو‌ عێراق و، ئەوانەی‌ ڕه‌قه‌ی سووریادا ببچڕێنێ.

ڕۆژنامه‌كه‌ له‌ وه‌سفی (مه‌سروور بارزانی)دا ده‌ڵێ، به‌ ئینگلیزیه‌كی زۆر ڕه‌وان قسه‌ی ده‌كرد و گوتی كه‌ ئوستوورەی داعش شكا.

واڵ‌ ستریت‌ جۆرنال ‌نووسیویه‌تی، دوای 15 مانگ كه‌ شنگال له‌ ده‌ستی داعشدا بوو پێشمه‌رگه‌ ئازادی كرده‌وه‌، هه‌روه‌ها پێشمه‌رگه‌ توانیویه‌تی كه‌ 7700 میلی‌دووجا له ‌ناوچه‌كه‌دا له‌ژێر ده‌ستی داعشدا ده‌ربێنێ. له‌و باره‌یه‌وه‌ (مه‌سروور بارزانی) ڕایگه‌یاند كه‌ به‌ مۆراڵی به‌رزی پێشمه‌رگه‌ و هاوكاریی ئه‌مه‌ریكا و هاوپه‌یمانان توانرا كه‌ 20 هه‌زار داعش له‌ ناوچه‌كه‌دا له‌ مه‌یدانی شه‌ڕدا دوور بخرێنه‌وه‌.

ڕاوێژكاری ئه‌نجوومه‌نی ئاسایش له‌ به‌ره‌ی پێشه‌وه‌ی جه‌نگ هۆڵی چاوپێكه‌وتنی هه‌بوو، به‌وێدا وێنه‌ی پاڵه‌وانی نه‌ته‌وه‌یی كوردستان (بارزانیی نه‌مر) دانرابوو، له‌باره‌ی ئازادكردنی شنگاله‌وه‌ دوا و گوتی، به‌ پلانێكی ژیرانه‌ و ستراتیژیانه‌ی سه‌ربازی و هه‌واڵگرییه‌ك له‌ ئاستی زۆر باشدا توانرا شنگال ئازاد بكرێ، وا پێشبینی ده‌كرا كه‌ ئازادكردنی شنگال زۆرتر بخایه‌نێ به‌ڵام له‌ واده‌ی 24 كاتژمێردا ئازاد كرا.

ده‌بێ ڕوون بكرێته‌وه‌ كه‌ ئیسلام ئه‌وه‌ی ئه‌و توندوتیژه‌ی قه‌بووڵ نییه‌
(مه‌سروور بارزانی) بۆ ڕۆژنامه‌كه‌ له‌باره‌ی مۆراڵی پێشمه‌رگه‌وه‌ گوتی، به‌ هه‌ستی به‌رگریكردن له‌ خاكی پیرۆزی كوردستان و به‌رگریكردن له‌ گه‌ل، به‌وپه‌ڕی باوه‌ڕ و په‌رۆشیانه‌وه‌ چووونه‌ به‌ره‌ی جه‌نگه‌وه‌ و به‌و ڕۆحیه‌ته‌ داعشیان شكاند؛ هه‌روه‌ك چۆن پێشووتریش به‌هه‌مان ڕۆحه‌وه‌ شكست به‌ (سه‌ددام) هات كه‌ هه‌وڵی زۆری بۆ له‌نێوبردنی كورد دا، ئه‌م ڕۆحیه‌ته‌ هۆكاری مانه‌وه‌ی ئێمه‌یه‌ كه‌ ئێستا هه‌ین.

رۆژنامی واڵ‌ستریت‌‌جۆرناڵ هاته‌ سه‌ر باسی بیری توندوتیژی كه‌ دینی ئیسلام ئه‌مه‌ی قه‌بووڵ نییه‌ وه‌ك ئه‌وه‌ی داعش ده‌یه‌وێ، (مه‌سروور بارزانی)ـیش ڕایگه‌یاند كه‌، پێویسته‌ زانایانی ئایینی ئیسلام زیاتر بۆ خه‌ڵكی ڕوون بكه‌نه‌وه‌ كه‌ ئیسلام ئه‌وه‌ی ئه‌و توندوتیژه‌ی قه‌بووڵ نییه‌.

لەبارەی سترارتیژیەتی ئەمەریکا و، هێرشە ئاسمانییەکان و، ئۆپەراسیۆنە تایبەتەکان بۆ لەناوبردنی داعش، ڕاوێژکاری ئەنجوومەنی ئاسایشی هەرێمی کوردستان دەڵێ، ئەوانە زۆر کاریگەرن بۆ ئەوەی داعش لاواز ببێت و، سەرکردەکانیان بکرێنە ئامانج، بەڵام هەرگیز بەو شێوەیە دژمن لەناو ناچێت ئەگەر هێزی زەمینی پێویستت نەبێت.

بە گوێرەی ڕاپۆرتەکە کورد پێی وایە، دەبێت حکوومەتی عێراق و هاوپەیمانان سەرکردایەتیی گرتنەوەی مووسڵ بکەن، ئەو کارە داوای هێزی ڕزگارکەر دەکات نەوەکو هێزێک کە حەساسیەت لەنیو کۆمەڵگاکاندا پەیدا بکات. هەروەها (مەسروور بارزانی) بە پێویستی زانیوە کە بەغدا دەبێت بتوانێت متمانەی سوننەکان بە دەست بهێنێتەوە و، هانیان بدات تا دژ بە داعش شۆڕش دەم بدەن.

پێشمەرگە شەرەفی نەتەوەییە
لە بەشێكی دیکەی ڕاپۆرتەکەدا باسی چەکەکانی دەستی پێشمەرگەی کوردستانی کردووە هەروەها پرۆسێسی ناردنەکەیشیان، (مەسروور بارزانی) گوتوویەتی، ئێمە ئەو جۆرە چەک و پێداویستیانەمان پێ نەگەیشتووە کە ویستومانە، یان ئەو ڕێژەیەی کە پێویستمان بووە. هەروەها ئاماژەیشی بەوە داوە، کە کەموکورتی لە پێداویستییە سەربازییەکانمان جاری وایە زۆر زۆرە و، زۆربەی چەکە قورسەکانیشمان کۆنن و لە ڕژێمەکەی (سەددام)ـدا دەستمان بەسەردا گرتوون.

پاساوێکی نەناردنی چەک بۆ پێشمەرگە ئەوەیە گوایە هێزێکی هۆکارە (پڕۆفیشناڵ) نییە؛ (مەسروور بارزانی) دەڵێت، پێشمەرگە بۆ ئێمە شەرەفی نەتەوەییە، ئەمەریکاییەکان دوای ڕووخانی (سەددام) ماوەی (10 ساڵ) ڕاهێنانیان بە سوپای عێراق کرد کە ببنە سوپایەکی ڕاهێنراوی هۆکارە، ملیاران دۆلاریشیان لێ خەرج کردن، بەڵام نەیانتوانی لە بەرانبەر داعشدا بۆ ماوەی (10 ڕۆژ) بوەستن و شەڕ بکەن، وەرە تۆ پێم بڵێ کامە هێزە پرۆفیشناڵە، پێشمەرگە یان سوپای عێراق؟

هەڵبەتە ئەمەریکا لەبەر مانەوەی یەکڕیزیی عێراق گەڕاوەتەوە بۆ عێراق و چەکی لە ڕێگای ئەوەوە ناردوە؛ (مەسروور بارزانی) پێی وایە کە بڕیارەکان سیاسی بووە، کە تاوەکو ئێستا پێشمەرگە بەو شێوەیە پشتگیری نەکراوە کە شایستەی بووە. 

هەروەها ڕاوێژکاری ئەنجوومەنی ئاسایشی هەرێمی کوردستان سەرنجی ئەوەی هەبووە کە کوردەکان ئەو شەڕە دەکەن کە شەڕی ڕۆژئاوایە و لەو بارەیەوە دەڵێت، ئێمە خوێن و گۆشت دەبەخشین، ئێمە گیان دەبەخشین کەوا زۆر زۆر لە سیستەمانی چەک و تەقەمەنی بە بەهاترن. بۆ ئەوەی یارمەتی بدرێین تا شەڕەکە ببەینەوە، جیهان، ڕۆژئاوا و، ئەمەریکا پێویستە باشتر چەک و پیداویستیمان بۆ دابین بکەن.

عێراق وڵاتێكی دروستكراو و تێكشكاوه‌
له‌ ڕاپۆرتەکەدا هاتووه‌، ئیدارەی ئەمەریکا سەروەری و یەکڕیزیی خاکی عێراقی بە بیانو هێناوەتەوە لە ڕێی ناردنی ڕاستەوخۆی چەک و هاوکاری بۆ کورد.

(مەسروور بارزانی)یش دەڵێت، گەورەترین گیروگرفت ئەوەیە کە تۆ لە ڕاستییەکان ڕابکەیت، عێراق وڵاتێکی دروستکراوە و، تێکشاوە. هەروەها هەمیشەیش دۆڕاو و، ڕووخاو بووە، عێراق لەسەر نەخشەدا هەیە، لەسەر نەخشە چەند سنوورێکی هەیە، بەڵام سنوورەکانی دەستکردن و سرووشتی نین.

لە بەشێکی دیکەدا ڕاپۆرتەکە باسی گرینگی هاوپەیمانەتیی کورد و ئەمەریکای کردووە و پێیوابووە، کە کورد ئەوەیان بۆ ڕۆژئاوا و ئەمەریکا سەلماندووە کە هاوپەیمانێکی باوەڕپێکراون. (مەسروور بارزانی)یش لەو بارەیەوە گوتوویەتی، لە تەواوی ناوچەکە لەوانەیە لە کوردەکان باشتر بۆ هاوپەیمانیی ئەمەریکاییەکان نەدۆزیتەوە. 

هەروەها لەسەر هاریکارییەکانی ڕۆژئاوا و ئەمەریکا ئێستا و ئەوسایش، ڕاوێژکاری ئەنجوومەنی ئاسایشی هەرێمی کوردستان سوپاسی کردوون و گوتوویەتی، ئێمە بۆ تاهەتایە سوپاسگوزارین، لەو ڕۆژەوەی کە ئەمەریکا هاوکاریمانی کرد بۆ ڕووخانی ڕژێمی (سەددام).

عەرەب 22 دەوڵەتیان هەیە، ئەدی بۆچی کورد دەوڵەتێکی خۆی نەبێت
لە کۆتاییی ڕاپۆرتەکە نووسراوه‌، درەنگ یان زوو داعش لەناو دەچێت، بەڵام دواڕۆژی خەڵکی ناوچەکە و پێکەوەژیانیان بە ئاشتیانە نادیارە، بۆیە نەیشاردەوە کە (بارزانی) خەون و خۆزگەی دەوڵەتی کوردی هەیە. (مەسروور بارزانی) له‌وباره‌یه‌وه‌ دەڵێت، بۆچی دەبێت هەموو نەتەوەکانی سەرزەوەی مافی سەربەخۆیی و خۆبەڕیوەبردنیان هەبێت بێجگە لە کورد؟ ئایا ئەوە دادوەرییە؟ ئایا ئەوە جیهان دەیەوێت؟

تورکەکان و ئێرانییەکان دەوڵەتی خۆیان هەیە؛ عەرەبیش 22 دەوڵەتیان هەیە، ئەدی بۆچی کورد دەوڵەتێکی خۆی نەبێت، ئێمە لەوە زیاتر داوا ناکەین و لەوەش کەمترمان ناوێت، ئەوەش هەر دێتە پێش و ڕوو دەدات، هەڵبەت پێویست ناکات ئەو مافە بە شەڕکردن بە دەست بهێنین.

مه‌سرور بارزانی پێشوازی له‌سه‌رۆكی ئیئتیلافی نیشتمانی سوریا و شاندێكی یا...

ئه‌مڕۆ به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له‌خالید خۆجه‌سه‌رۆكی ئیئتیلافی نیشتمانی سوریا و شاندێكی یاوه‌ری كرد، كه‌پێكهاتبوو له‌عه‌بدولئه‌حه‌د ئه‌ستیفۆ ئه‌ندامی ده‌سته‌ی سیاسی ئیئتیلافی نیشتمانی سوریا و عه‌بدولباست سه‌یدا سه‌رۆكی ئه‌نجوومه‌نی نیشتمانی سوری و كه‌سایه‌تی سه‌ربه‌خۆی ناو ئیئتیلافی نیشتمانی سوریا.



له‌دیدارێكدا گفتوگۆ له‌باره‌ی دوا په‌ره‌سه‌ندنه‌سیاسی و سه‌ربازییه‌كانی دۆخی سوریا به‌گشتی و ئیئتیلافی نیشتمانی سوریا كرا.



سه‌ره‌تا سه‌رۆكی شاندی ئیئتیلافی نیشتمانی سوریا باسی له‌كارو چالاكی ئیئتیلافی نیشتمانی سوریا و كۆبوونه‌وه‌ی فره‌وانی داهاتووی ئیئتیلافی نیشتمانی سوریا له‌ریازی پایته‌ختی شانشینی عه‌ره‌بی سعودیا و دۆخی مه‌یدانی هێزه‌چه‌كداره‌كانی ئۆپۆزیسیۆنی میانڕۆی سوریا كرد. پاشان گفتوگۆ له‌باره‌ی قۆناغی گواستنه‌وه‌و ئاینده‌ی سوریا و دابینكردنی مافی گشت پێكهاته‌كان كرا.



له‌وباره‌وه‌راوێژكاری ئه‌نجوومه‌نی ئاسایشی هه‌رێمی كوردستان ئاماژه‌ی به‌وه‌دا، كه‌ هه‌رێمی كوردستان پاڵپشتی له‌چه‌سپاندنی دیموكراتی و سه‌قامگیری و ئاشتی و مافی پێكهاته‌كان له‌سوریا ده‌كات و رایگه‌یاند، پێویسته‌گه‌ره‌نتیه‌ك هه‌بێت، كه‌له‌سوریای ئاینده‌دا گشت پێكهاته‌كان به‌مافه‌كانیان ئاشنا ده‌بن و كه‌س په‌راوێز نا‌خرێ.



له‌به‌شێكی دیكه‌ی دیداره‌كه‌دا باس له‌بارودۆخی شه‌ڕی تیرۆریستانی داعش له‌سوریا و ناوچه‌كه‌كرا و دووپات له‌وه‌كرایه‌وه‌، كه‌هه‌رچه‌نده‌راگرتنی هاوسه‌نگی له‌نێوان هه‌موو ئه‌و هێزانه‌ی له‌مه‌یدانه‌كه‌دا هه‌ن، كارێكی قوڕسه‌، به‌ڵام له‌ئێستادا پێویسته‌شه‌ڕی دژ به‌تیرۆریستانی داعش له‌پێشه‌وه‌ی كار و هه‌وڵه‌كانی ئیئتیلافی نیشتمانی سوریا دا بێت، كه‌ئه‌مڕۆ بۆته‌هه‌ڕه‌شه‌یه‌كی جددی بۆ گشت جیهان.

مه‌سرور بارزانی: ئه‌گه‌ر داعش تێك نه‌شكێندرێ؛ هێرشی تیرۆریستیی زیاتر ده‌...

مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان له‌ دیدارێكیدا له‌گه‌ڵ كه‌ناڵی ئاسمانیی تی ڤی دووی نۆرویژدا، وێڕای داواكردنی پاڵپشتی زیاتر بۆ هێزی پێشمه‌رگه‌ی كوردستان له‌ نۆرویژ و وڵاتانی ئازاددا، هاوكات گوتی: ده‌مانه‌وێ نۆرویژ هاوكارییه‌كی گه‌وره‌ترمان بكات و چه‌ك و پێداویستی سه‌ربازی و ته‌قه‌مه‌نی باشتر بۆ پێشمه‌رگه‌ دابین بكات، له‌به‌رئه‌وه‌ی پێشمه‌رگه‌ كاریگه‌رترین هێزه‌، كه‌ له‌بری هه‌مووان شه‌ڕی تیرۆریستانی داعش ده‌كات. 

هه‌روه‌ها له‌باره‌ی رۆڵی پێشمه‌رگه‌ و هاوكاریكردنیدا گوتی: هه‌ر پێشمه‌رگه‌یه‌ك، كه‌ له‌ هێلی پێشه‌وه‌ی شه‌ڕه، ئه‌ویش‌ خاوه‌ن خێزان، دایك، باوك، منداڵ و هاوسه‌ره‌، بۆیه‌ پێویسته‌ به‌و شێوه‌یه‌ بیر له‌وه‌ بكرێته‌وه‌، كه‌ چۆن سه‌ربازێكی خۆتان‌ له‌ هێلی پێشه‌وه‌ هاوكاری و پاڵپشتی ده‌كرێ، ئێمه‌ش چاومان له‌وه‌یه‌ پێشمه‌رگه‌ هه‌مان هاوكاری و پاڵپشتی بكرێ له‌لایه‌ن نۆرویژ و هه‌موو ئه‌و ده‌وڵه‌تانه‌ی بڕوایان به‌ دیموكراسی و پێكه‌وه‌ژیان هه‌یه‌ و دژی تیرۆر و توندڕۆن.

له‌باره‌ی روودانی هێرشه‌ تیرۆریستییه‌كانی پاریس، راوێژكاری ئه‌نجوومه‌نی ئاسایشی هه‌رێمی كوردستان گوتی: پار له‌ لێدوانێكمدا كۆمه‌ڵگه‌ی نێوده‌وڵه‌تیم له‌وه‌ ئاگادار كرده‌وه‌ و گوتم، داعش به‌ ته‌نها هه‌ڕه‌شه‌ نییه‌ بۆ سه‌ر ئه‌م ناوچه‌یه‌، به‌ڵكو هه‌ڕه‌شه‌یه‌ بۆ سه‌ر كۆمه‌ڵگه‌ی نێوده‌وڵه‌تیش. 

بۆیه‌ هه‌رچه‌نده‌كی داعش له‌م ناوچه‌یه‌ بمێنێته‌وه‌، ده‌توانێ میتۆدی جودا په‌ره‌ پێ بدات بۆئه‌وه‌ی له‌ ناوچه‌ی جیاجیای جیهاندا كرده‌وه‌ی تیرۆریستی بكه‌ن. 

هه‌روه‌ها گوتی: ماوه‌یه‌كی درێژ بوو داعش ئه‌م پلانه‌ی دانا بوو، ته‌نها چاوه‌ڕێی كاتی گونجاوی ده‌كرد، واته‌ ئه‌وان ئاماده‌ییان كردبوو بۆ ئه‌نجامدانی ئه‌و كرده‌وه‌ تیرۆریستییه‌، هیچ گومانی تێدا نییه،‌ ئه‌گه‌ر داعش تێك نه‌شكێندرێ و له‌ژێر گوشار نه‌مێنێته‌وه‌ هێرشی زیاتر ده‌كات. 

له‌باره‌ی چۆنیه‌تی تێكشكاندنێكی خێرای داعش، مه‌سرور بارزانی گوتی: داعش هه‌ر تێكده‌شكێ، ئه‌مه‌ جێی پرسیار نییه، به‌ڵكو ئێمه‌ ته‌نها قسه‌ له‌سه‌ر ئه‌وه‌ ده‌كه‌ین، كه‌ینێ؟ من دووباره‌ی ده‌كه‌مه‌وه‌، ئه‌گه‌ر جیهان ده‌یه‌وێ به‌ خێرایی داعش له‌ناوبچێ، پێویست به‌ پابه‌ندبوونی زیاتری هه‌موو لایه‌نه‌كان ده‌كات‌.‌ 

ئه‌گه‌ر بۆ ئه‌مه‌ به‌ ته‌نها پشت به‌ خه‌ڵكی خۆجێیی ببه‌سترێ، ئه‌مه‌ درێژه‌ ده‌كێشێ، به‌مه‌ش داعش ده‌توانێ نه‌ك هه‌ڕه‌شه‌ له‌م ناوچه‌یه‌ بكات، به‌ڵكو هه‌ڕه‌شه‌ ده‌بێت بۆ سه‌رتاپای جیهان. 

هه‌روه‌ها به‌ بڕوای من داعش ئاینده‌ی نییه‌، به‌ڵام هه‌ر چه‌نده‌كی بمێنێته‌وه‌ ده‌توانێ هه‌ڕه‌شه‌ی زیاتر دروست بكات.

‫راوێژكارى ئه‌نجوومه‌نى ئاسایشى هه‌رێم پێشوازیی له‌ باڵیۆزی نۆروێژ له‌ ئ...

مه‌سرور بارزانی: باشترین چاره‌سه‌ر بۆ كێشه‌كانی نێوان به‌غدا و هه‌ولێر ئه‌وه‌یه‌ ببنه‌ دوو هاوسێی باش



پاشنیوه‌ڕۆی ئه‌مڕۆ یه‌كشه‌ممه‌29/11/2015 به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له‌خاتوو سیسێڵ برێی بالیۆزی نه‌رویج له‌ئوردن و عێراق و شاندێكی یاوه‌ری كرد.



له‌دیدارێكدا دوا په‌ره‌سه‌ندنه‌سیاسی و سه‌ربازییه‌كانی ناوچه‌كه‌تاوتوكرا و شاندی میوان پیرۆزبایی خۆیان به‌رامبه‌ر سه‌ركه‌وتنی پێشمه‌رگه‌له‌ئۆپه‌راسیۆنی ئازادكردنی شنگال راگه‌یاند و ئاماژه‌یان به‌ئازایه‌تی و قاره‌مانێتی پێشمه‌رگه‌كرد له‌تێكشكاندن و پاشه‌كشه‌كردندا به‌تیرۆریستانی داعش.



له‌به‌رامبه‌ردا مه‌سرور بارزانی ئاماژه‌ی به‌وه‌دا، ‌پێشمه‌رگه‌توانیویه‌تی له‌به‌ره‌كانی جه‌نگدا تیرۆریستانی داعش تێكبشكێنی و پاشه‌كه‌شی پێ بكات و ناوچه‌یه‌كی فره‌وانی لێ پاك بكاته‌وه‌، به‌ڵام كۆتایی پێهاتنی ته‌واوه‌تی داعش پێویستی به‌پاڵپشتی و هاوكاری زیاتر هه‌یه‌و پێویسته‌كۆمه‌ڵگه‌ی نێوده‌وڵه‌تی زیاتر پێشمه‌رگه‌پڕ چه‌ك بكات.



له‌ته‌وه‌رێكی دیكه‌ی دیداره‌كه‌دا گفتوگۆ له‌باره‌ی كێشه‌كانی عێراق به‌گشتی، كێشه‌كانی نێوان به‌غدا و هه‌ولێر كرا، كه‌رۆژ به‌رۆژ به‌هۆی ئه‌م كێشانه‌وه‌ كه‌لێنی نێوان پێكهاته‌كان فره‌وانتر ده‌بێت، له‌وباره‌وه‌راوێژكاری ئه‌نجوومه‌نی ئاسایشی هه‌رێمی كوردستان رایگه‌یاند، ‌بۆ چاره‌سه‌ركردنی كێشه‌كانی عێراق پێویسته سه‌یری هۆكاری راسته‌قینه‌ی كێشه‌كان بكرێ و زۆر گرنگه‌كۆمه‌ڵگه‌ی نێوده‌وڵه‌تی بژارده‌ی دیكه‌تاقی بكاته‌وه‌و گوتی: ده‌بێ پێكهاته‌كان به‌گفتوگۆ و لێك تێگه‌یشتن چاره‌سه‌ری كێشه‌كان بكه‌ن و باشترین چاره‌سه‌ریش بۆ كۆی كێشه‌كانی نێوان به‌غدا و هه‌ولێر ئه‌وه‌یه‌ببنه‌دوو هاوسێی باش.



هه‌ر له‌دیداره‌كه‌دا تیشك خرایه‌سه‌ر كێشه‌ی دارایی هه‌رێمی كوردستان و ئاماژه‌به‌وه‌درا، كه‌پێویسته‌كۆمه‌ڵگه‌ی نێوده‌وڵه‌تی هاوكار بێت بۆ چاره‌سه‌ركردنی كێشه‌كانی هه‌رێمی كوردستان و رێگری نه‌كرێت له‌هه‌وڵه‌كانی گه‌شه‌سه‌ندنی زیاتری هه‌رێمی كوردستان .



له‌ته‌وه‌رێكی دیكه‌دا كێشه‌كانی هه‌رێمی كوردستان و دۆخی سیاسی ناوچه‌كه‌ تاوتوكرا و دووپات له‌رێگه‌چاره‌ی ئاشتیانه‌ كرایه‌وه‌.

‫راوێژكاری ئه‌نجوومه‌نی ئاسایشی هه‌رێم مه‌سرور بارزانی و وه‌زیری به‌رگری...

مەسرور بارزانی: دەبێت پێش ئۆپەراسیۆنی رزگارکردنی موسڵ رێککەوتن لە سەر رەوشی ئیداری و سەربازییی ئەم پارێزگایە بکرێت

خالید عوبێدی: بەربەستەکانی بەردەم هاوکاریی پێشمەرگە سیاسین

دوا نیوەرۆی ئەمرۆ شه‌ممه‌ 28/11/2015 به‌ڕێز مەسرور بارزانی راوێژکاری ئەنجوومەنی ئاسایشی هەرێمی كوردستان پێشوازیی لە خالید عوبێدی وەزیری بەرگریی عێراق و فەریق ئەنوەر حەمەدەمین فەرماندەی هێزە ئاسمانییەکانی عێراق کرد. لە دیدارێکدا دوا پەرەسەندنە ئەمنی و سەربازییەکانی دەڤەرەکە و چۆنیەتی هەماهەنگیی نێوان دامودەزگا سەربازی و ئەمنییەکانی هەرێم و بەغدا تاوتوێ کران.

لەم دانیشتنەدا تیشک خرایە سەر بابەتی رزگارکردنی موسڵ و وەزیری بەرگریی عێراق ئۆپەراسیۆنی رزگارکردنی شنگالی بە سەرکەوتنێکی گەورە پێناسە کرد کە کاریگەریی زۆری لە سەر پرۆسەی رزگارکردنی موسڵ دەبێت.

هەر پەیوەست بەم بابەتەوە راوێژکاری ئەنجوومەنی ئاسایشی هەرێم ئاماژەی بەوەدا کە هەرێم تەنیا مامەلە لەگەل هێزە فەرمی و دەستورییەکانی عێراقدا دەکات چونکە ئەم هێزانە نابنە هۆی ورووژاندنی هەستیاریی تایفی. لە بارەی بەشداریی پێشمەرگەش لەم ئۆپەراسیۆنەدا راوێژکاری ئەنجوومەنی ئاسایش ڕوونی کردەوە کە پێشمەرگە هێزێکی کاریگەری سەر زەوییە بۆ رووبەڕووبوونەوەی تیرۆریستان و بۆیە هاوکار دەبێت بۆ لەناوبردنی تیرۆریستان لە هەر ناوچەیەک کە پێویست بکات، بەڵام مەسرور بارزانی ئاماژەی بەوەش کرد کە قۆناغی دوای رزگار کردنی موسڵیش بۆ هەرێم گرنگە و دەبێت پێشتر ڕوون ببێت و رێکەوتن هەبێت کە پێشمەرگە لە چ دەڤەر و هێلێک جێگیر دەبێت و چۆن ئیدارەیەکی هاوسەنگ بۆ ئەم پارێزگایە دادەنرێت بەجۆرێک هەلەکانی ڕابردوو بەرامبەر بە پێکهاتە جیاجیاکانی ئەم پارێزگایە دووبارە نەبنەوە.

لە میانەی ئەم دیدارەدا وەزیری بەرگری توانا و قارەمانێتی پێشمەرگەی بە بەرز نرخاند و ئاماژەی بەوەدا کە هاوکاریی بەغدا بۆ پێشمەرگە لە ئاستی پێویست نەبووە و هیوای خواست بەربەستە سیاسییەکانی بەردەم هاوکاریی پێشمەرگە لابدرێن.