Thursday, January 14, 2016
مه‌سرور بارزانی: پێویسته ئه‌ندامانی هاوپه‌یمانی جیهانی دژی داعش زیاتر هاوكاری و پاڵپشتی یه‌كتر بكه‌ن
ئه‌مڕۆ پێنجشه‌ممه 14/1/2016 مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان له‌میانه‌ی پێشوازی كردنی له شاندێكی باڵای سه‌ربازی فه‌ڕه‌نسا به‌سه‌رۆكایه‌تی (جه‌نه‌ڕاڵ گریكۆر دی سانت كۆینتن) فه‌رمانده‌ی فه‌رمانده‌یی ئۆپه‌راسیۆنی تایبه‌تی فه‌ڕه‌نسا، ئاماژه‌ی به‌وه‌دا، كه تا ئێستاش داعش و تیرۆر هه‌ڕه‌شه‌ن بۆ سه‌ر ئاسایشی جیهان، باشترین به‌ڵگه‌هێرش و په‌لاماره‌كانی فه‌ڕه‌نسا بوو.
ئه‌مه‌ش ده‌خوازێ زیاتر هاوكار و پاڵپشتی یه‌كتری بكرێت و پێویسته‌وڵاتانی ئه‌ندام له هاوپه‌یمانی جیهانیدا له‌پێداویستی و تێچووی شه‌ڕه‌كه‌دا پاڵپشتی زیاتری پێشمه‌رگه‌بكه‌ن.
راوێژكاری ئه‌نجوومه‌نی ئاسایشی هه‌رێمی كوردستان ئاماژه‌ی به‌سه‌ركه‌وتنه‌كانی پێشمه‌رگه‌كرد و رایگه‌یاند، له‌وكاته‌ی شه‌ڕه‌كه‌ده‌ستی پێكردووه، هێرشه‌كه‌ی مانگی كانوونی یه‌كه‌می رابردووی داعش دژ به‌سه‌نگه‌ره‌كانی به‌رگری پێشمه‌رگه‌یه‌كێك بوو له‌گه‌وره‌ترین هێرشه‌كانی، به‌ڵام به‌ئازایه‌تی و قاره‌مانی پێشمه‌رگه‌تێكشكێندرا.
مه‌سرور بارزانی، داوای له‌شاندی باڵای سه‌ربازی فه‌ڕه‌نسا كرد، پێویسته‌له‌گه‌ڵ ئه‌ندامانی دیكه‌ی هاوپه‌یمانی جیهانیدا دووپات له چاره‌سه‌ری كێشه‌ئابووری و دارییه‌كانی هه‌رێمی كوردستان بكرێته‌وه، كه‌به‌هۆی بڕینی بودجه‌له‌لایه‌ن به‌غدا، تێچووی زۆری شه‌ڕ، بوونی ژماره‌یه‌كی زۆری ئاواره‌و دابه‌زینی نرخی نه‌وت روبه‌ڕووی بووه‌ته‌وه.
له‌لای خۆیه‌وه‌سه‌رۆكی شاندی باڵای سه‌ربازی فه‌ڕه‌نسا رایگه‌یاند، فه‌ڕه‌نسا به‌نیازه‌كۆمه‌ڵێك هه‌نگاو بگرێته‌به‌ر بۆ پشتیوانیكردنی زیاتری پێداویستی شه‌ڕه‌كه‌بۆ هێزی پێشمه‌رگه‌له‌شه‌ڕی داعشدا.
تاوتوكردنی بارودۆخی سیاسی به‌گشتی و گرتنه‌به‌ری رێوشوێنی سه‌ربازی بۆ زیاتر گۆشه‌گیركردنی تیرۆریستانی داعش به‌شێكی دیكه‌ی دیداره‌كه‌بوو.
Wednesday, January 13, 2016
مه‌سرور بارزانی: كێشه‌ی عێراق ته‌نها شه‌ڕی تیرۆریستانی داعش نییه، به‌ڵكو زۆر كێشه‌ی مێژوویی قوڵتری هه‌یه
ئه‌مڕۆ چوارشه‌ممه 13/1/2016 مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان له‌دیدارێكیدا له‌گه‌ڵ (جه‌نه‌ڕاڵ تۆم بێكت) نوێنه‌ری تایبه‌تی سه‌رۆك وه‌زیرانی به‌ریتانیا بۆ كاروباری ئاسایش و شاندی یاوه‌ری ئاماژه‌ی به‌وه‌دا، كه‌كێشه‌ی عێراق ته‌نها شه‌ڕی تیرۆریستانی داعش نییه، به‌ڵكو زۆر كێشه‌ی مێژوویی قوڵتری هه‌یه، پێویست ده‌كات چاره‌سه‌ری ریشه‌یی بكرێن.
راوێژكاری ئه‌نجوومه‌نی ئاسایشی هه‌رێمی كوردستان تیشكی خسته‌سه‌ر بارودۆخی به‌ره‌كانی روبه‌ڕووبوونه‌وه‌ی تیرۆریستانی داعش و رایگه‌یاند، گرنگی تێكشكاندنی سه‌ربازییانه‌ی داعش له‌وه‌دایه، كه‌ده‌بێته‌سه‌ره‌تایه‌ك بۆ له‌ناوبردنی ئه‌م رێكخراوه‌تیرۆریستییه‌جیهانییه‌و گوتی: بۆ به‌دیهاتنی ئه‌مه‌ش پێویسته‌هێزه‌كانی له‌سه‌ر زه‌وی شه‌ڕی داعش ده‌كه‌ن هه‌موو جۆره‌هاوكارییه‌كی پێویست له‌ڕووی پێداویستی سه‌ربازی و تێچووی شه‌ڕه‌وه‌بكرێن.
مه‌سرور بارزانی، وێڕای ئاماژه‌دان به‌خۆڕاگری و قاره‌مانیه‌تی پێشمه‌رگه‌و بوونی ژماره‌یه‌كی زۆری ئاواره‌باسی له‌كێشه‌ی ئابوری و قه‌یرانی دارایش كرد و رایگه‌یاند، ئێمه‌روبه‌ڕووی قه‌یرنی دارایش بووینه‌ته‌وه، كه نیگه‌رانییه‌كی گه‌وره‌ی دروست كردووه.
له‌به‌رامبه‌ردا نوێنه‌ری تایبه‌تی سه‌رۆك وه‌زیرانی به‌ریتانیا بۆ كاروباری ئاسایش ئاماژه‌ی به‌رۆڵی كاریگه‌ری كورد له‌تێكشكاندنی داعش له‌هه‌رێمی كوردستان و رۆژئاوا كرد و رایگه‌یاند، ئه‌گه‌ر هێزی كورد و پشتیوانی فڕۆكه‌كانی هێزی هاوپه‌یمانان نه‌بوایه، بارودۆخه‌كه‌زۆر له‌وه‌خراپتر ده‌بوو، كه وه‌كو كورد به‌گشتی و هێزی پێشمه‌رگه‌به‌تایبه‌تی له‌تێكشكاندن و ده‌ركردنی داعش به‌رده‌وامن.
هه‌ر له‌دیداره‌كه‌دا دووپات له‌وه‌كرایه‌وه، كه‌پێویسته‌كورد، وه‌ك ئه‌ندامێكی كارای سه‌ر زه‌وی هاوپه‌یمانی جیهانی دژ به‌داعش له‌سه‌رجه‌م كۆنفرانسه‌نێوده‌وڵه‌تیه‌كانی تایبه‌ت به‌و شه‌ڕه‌جیهانییه‌به‌فه‌رمی بانگهێشتی به‌شداری بكرێ، چونكه‌ئه‌نجامی ئه‌م كۆنفرانسانه‌به‌به‌شداری كورد كاریگه‌رتر ده‌بن.
Tuesday, January 12, 2016
مەسرور بارزانی پێشوازیی لە بالیۆزی ئیتالیا لە عێراق کرد 12 1 2016
مەسرور بارزانی داوا لە کۆمەلگای نێودەولەتی دەکات لە خەرجیی شەری تیرۆر هاوکاریی هەرێم بکرێت
ئەمرۆ سێشه‌ممه مەسرور بارزانی راوێژکاری ئەنجوومەنی ئاسایشی هەرێمی کوردستان لە میانەی پێشوازیی لە مارکۆ کارنێلۆس بالیۆزی ئیتالیا لە عێراق، ئاماژەی بەوە کرد، کە گوشاری دارایی رۆژ بە رۆژ لە سەر هەرێمی کوردستان زیاتر دەبێت و ئەم چەندەش ئەرکی هەرێم لە شەری دژە تیرۆردا قورستر و سەختتر دەکات.
راوێژکاری ئەنجوومەنی ئاسایشی هەرێمی کوردستان ئاماژەی بەوە کرد، لە دوای ئەو هەموو قەیرانانەی بەرۆکی هەرێمی گرتووە، بە تایبەت لە دوای پەنادان بە نزیکەی دوو ملیۆن پەنابەر و ئاوارە و بڕینی بودجەی هەرێم لە لایەن بەغدا و دابەزینی نرخی نەوت، ئەرکی دارایی هەرێم بۆ بەڕێوەبردنی هەزاروپەنجا کیلۆمەتر بەرەی جەنگ رۆژ بەرۆژ سەختتر دەبێت.
مەسرور بارزانی باسی لەوە کرد کە، پێشمەرگە لە بری هەموو جیهان لە بەرەی پێشەوەی جەنگی دژی تیرۆرن و دەبێت باشتر خزمەت بکرێن، ئەمە ئەرکی کۆمەڵگای نێودەولەتییە، کە وێڕای هاوکاریی سەربازییی پێشمەرگە لە ڕووی چەک و تەقەمەنیی پێویست، دەبێت لە ڕووی داراییشەوە هاوکاریی هەرێم بکەن تاکو مووچەی شایستەی پێشمەرگە لە کاتی خۆیدا دابین بکرێت و ئەرکی دارایی هەرێم لە خەرجیی جەنگ سوکتر بکرێت.
بالیۆزی ئیتالیاش لە پەیوەندی بە بابەتی جەنگی تیرۆر وێرای سوپاسیی هەرێم و هێزی پێشمەرگە وەک هێزێکی کاریگەری سەر زەوی لە جەنگی دژە تیرۆر، بەڵێنیدا، کە بابەتی پاڵپشتیی دارایی هەرێم لە ئاستی هاوپەیمانانی جەنگی دژە تیرۆر بخەنە بەر باس و جەختی لەسەر ئەوە کردەوە، کە هەرێمی کوردستان ئەندامێکی کاریگەری هاوپەیمانیی نێودەوڵەتییە لە بەرەی دژ بە تیرۆر. بۆیە ئەرکی کۆمەڵگای نێودەوڵەتییە یارمەتیی پێویست بە هەرێم بگەیەنێن.
هەر لەم کۆبوونەیەدا بالیۆزی ئیتالیا ئاماژەی بەوەدا، کە بە نیازن رێژەی راوێژکارە سەربازییەکان بۆ یارمەتیدانی پێشمەرگە لە هەرێمدا زیاد بکەن.
Monday, January 11, 2016
مه‌سرور بارزانی پێشوازی له‌شاندێكی وه‌زاره‌تی به‌رگری كۆماری چیك کرد11-1...
ئه‌مڕۆ دووشەممە 11/ 1/ 2016 به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی لە شاندێكی وەزارەتی بەرگریی كۆماری چیك بە سەرۆكایەتی جاكوب لاندۆڤێسكی جێگری وەزیری بەرگریی كۆماری چیك بۆ كاروباری سیاسی و ستراتیژی كرد، كه له ژماره‌یه‌ك به‌رپرسی سه‌ربازی و سیاسی پێكهاتبوو.
لە دیدارێكدا، كه به ئاماده‌بوونی ئه‌لێكسه‌نده‌ر لانگه‌ر بالیۆزی كۆماری چیك له عێراق و یارۆسلاڤ ریف كونسولی گشتی كۆماری چیك له هه‌ولێر به‌ڕێوه‌چوو. جێگری وەزیری بەرگریی كۆماری چیك له به‌رامبه‌ر ئازایەتی و قوربانیدانی پێشمەرگە له شه‌ڕی تیرۆیستاندا سوپاسی حكوومه‌تی وڵاته‌كه‌ی پێشكه‌شكرد و ڕایگەیاند، وڵاتەكەی لە پێشكەشكردنی هاوكاری سەربازی و مەشق و ڕاهێنان به پێشمەرگە و هێزه ئه‌منییه‌كانی كوردستان بەردەوام دەبێت.
له به‌رامبه‌ردا مه‌سرور بارزانی سوپاسی گه‌ل و حكوومه‌تی كۆماری چیكی كرد بۆ هاوكاری و پشتیوانیان بۆ هێزه‌كانی پێشمه‌رگه له دژی تیرۆریستانی داعش و رایگه‌یاند، تێكشكاندنی تیرۆریستانی داعش پێویستی به هه‌وڵی هاوبه‌شی هه‌موو لایه‌ك هه‌یه. هه‌روه‌ها جه‌ختی له‌وه‌شكرده‌وه، كه ئه‌و هاوكارییه سه‌ربازییانه‌ی گه‌یشتوون له ئاست گه‌وره‌یی و به‌رفره‌وانی ئه‌و شه‌ڕه‌دا نییه و گوتی: ده‌بێ ئێمه بۆ تێكشكاندنی داعش له‌ڕووی چه‌ندایه‌تی و جۆرایه‌تی چه‌ك و پێداویستییه‌كانی شه‌ڕ زیاتر پڕچه‌ك بكرێین و پێویستیمان به یارمه‌تی نێوده‌وڵه‌تی هه‌یه.
جێگری وەزیری بەرگریی كۆماری چیك وێڕای ئاماژەدان بەوه‌ی تیرۆریستانی داعش هه‌ڕه‌شه‌ن بۆ سەر ئاسایشی جیهان، ئاماژه‌ی به‌وه‌شدا، كە له كێشه‌و پێداویستییه‌كانی هه‌رێمی كوردستان تێده‌گه‌ن و وه‌ك كۆماری چیك ئاماده‌ن بۆ پێشكه‌شكردنی كه‌ره‌سته و پێداویستی زیاتر و له پشتیوانی كردنیشیدا به‌رده‌وام ده‌بن.
له به‌شێكی دیكه‌ی دیداره‌كه‌دا راوێژكاری ئه‌نجوومه‌نی ئاسایشی هه‌رێمی كوردستان باسی له هۆكاره‌كانی ده‌ركه‌وتن و ڕێگەكانی ڕووبەڕووبوونەوەی تیرۆر و له‌ناوبردنی تیرۆریستان لە ئاستی ناوچەیی و جیهانی كرد،كە پێویستە لەپاڵ رێگه‌چاره‌ی سەربازیی، له‌ڕووی ئایدیۆلۆژی و داراییشه‌وه روبه‌ڕووبونه‌وه‌ی تیرۆریستان بگیردرێته‌به‌ر.
بارودۆخی سیاسی عێراق و ناوچەكە و فراوانتركردن و به‌رده‌وامی پەیوەندییەكانی نێوان هه‌رێمی كوردستان و كۆماری چیك لە بوارە جیاجیاكاندا تاوتوكرا.
Sunday, January 3, 2016
مه‌سروور بارزانی: پێناسه‌یه‌ك بۆ عێراقێكی یه‌كگرتوو له‌ئارادا نییه
مه‌سروور بارزانى راوێژكارى ئه‌نجوومه‌نى ئاسایشى هه‌رێمى كوردستان رایگه‌یاندووه كه سووننه یان شێعه ئه‌و كاته بڕوایان به عێراقێكى یه‌كگرتوو هه‌یه ئه‌گه‌ر ته‌نها خۆیان حوكمڕان بن بۆیه پێناسه‌یه‌ك بۆ عێراقێكی یه‌كگرتوو له‌ئارادا نییه.
رۆژنامه‌ی واشنتۆن پۆست له‌راپۆرتێكیدا له‌نووسینی لیز سلیدا، به‌ناونیشانی چۆن جه‌نگی دژ به‌ده‌وڵه‌تی ئیسلامی دووباره نه‌خشه‌ی رۆژهه‌ڵاتی ناوه‌ڕاست ده‌كێشێته‌وه ئاماژه‌ی به‌لێدوانێكی مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان كردووه كه تێیدا ده‌ڵێت پێویست به بڕیارێكی بوێر هه‌یه بۆ بینینی راستیبه‌كان و رێگه‌دان به‌خه‌ڵك له‌وه‌ى كه بریار بده‌ن چیان ده‌وێت .
مه‌سروور بارزانى راشیگه‌یاندووه كه عێراق پارچه بووه، سونه ئه‌و كاته بڕوایان به عێراقێكی یه‌كگرتوو هه‌یه ته‌نها ئه‌گه‌ر خۆیان حكومڕان بن ، شیعه‌ش ئه‌و كاته بڕوایان به عێراقێكی یه‌كگرتوو هه‌یه ته‌نها ئه‌گه‌ر خۆیان حكومڕان بن ، پێناسه‌یه‌ك بۆ عێراقێكی یه‌كگرتوو له‌ئارادا نییه .
هه‌روه‌ها گوتوشیه‌تى: هه‌ر هه‌وڵدانێك بۆ پاراستنی وڵات به یه‌كگرتوویی دژ به ویست و ئیراده‌ی خه‌ڵك، سه‌ركه‌وتوو نابێت .
Subscribe to:
Posts (Atom)