Saturday, November 28, 2015
راوێژكاری ئه‌نجوومه‌نی ئاسایشی هه‌رێم مه‌سرور بارزانی و وه‌زیری به‌رگری...
مەسرور بارزانی: دەبێت پێش ئۆپەراسیۆنی رزگارکردنی موسڵ رێککەوتن لە سەر رەوشی ئیداری و سەربازییی ئەم پارێزگایە بکرێت
خالید عوبێدی: بەربەستەکانی بەردەم هاوکاریی پێشمەرگە سیاسین
دوا نیوەرۆی ئەمرۆ شه‌ممه 28/11/2015 به‌ڕێز مەسرور بارزانی راوێژکاری ئەنجوومەنی ئاسایشی هەرێمی كوردستان پێشوازیی لە خالید عوبێدی وەزیری بەرگریی عێراق و فەریق ئەنوەر حەمەدەمین فەرماندەی هێزە ئاسمانییەکانی عێراق کرد. لە دیدارێکدا دوا پەرەسەندنە ئەمنی و سەربازییەکانی دەڤەرەکە و چۆنیەتی هەماهەنگیی نێوان دامودەزگا سەربازی و ئەمنییەکانی هەرێم و بەغدا تاوتوێ کران.
لەم دانیشتنەدا تیشک خرایە سەر بابەتی رزگارکردنی موسڵ و وەزیری بەرگریی عێراق ئۆپەراسیۆنی رزگارکردنی شنگالی بە سەرکەوتنێکی گەورە پێناسە کرد کە کاریگەریی زۆری لە سەر پرۆسەی رزگارکردنی موسڵ دەبێت.
هەر پەیوەست بەم بابەتەوە راوێژکاری ئەنجوومەنی ئاسایشی هەرێم ئاماژەی بەوەدا کە هەرێم تەنیا مامەلە لەگەل هێزە فەرمی و دەستورییەکانی عێراقدا دەکات چونکە ئەم هێزانە نابنە هۆی ورووژاندنی هەستیاریی تایفی. لە بارەی بەشداریی پێشمەرگەش لەم ئۆپەراسیۆنەدا راوێژکاری ئەنجوومەنی ئاسایش ڕوونی کردەوە کە پێشمەرگە هێزێکی کاریگەری سەر زەوییە بۆ رووبەڕووبوونەوەی تیرۆریستان و بۆیە هاوکار دەبێت بۆ لەناوبردنی تیرۆریستان لە هەر ناوچەیەک کە پێویست بکات، بەڵام مەسرور بارزانی ئاماژەی بەوەش کرد کە قۆناغی دوای رزگار کردنی موسڵیش بۆ هەرێم گرنگە و دەبێت پێشتر ڕوون ببێت و رێکەوتن هەبێت کە پێشمەرگە لە چ دەڤەر و هێلێک جێگیر دەبێت و چۆن ئیدارەیەکی هاوسەنگ بۆ ئەم پارێزگایە دادەنرێت بەجۆرێک هەلەکانی ڕابردوو بەرامبەر بە پێکهاتە جیاجیاکانی ئەم پارێزگایە دووبارە نەبنەوە.
لە میانەی ئەم دیدارەدا وەزیری بەرگری توانا و قارەمانێتی پێشمەرگەی بە بەرز نرخاند و ئاماژەی بەوەدا کە هاوکاریی بەغدا بۆ پێشمەرگە لە ئاستی پێویست نەبووە و هیوای خواست بەربەستە سیاسییەکانی بەردەم هاوکاریی پێشمەرگە لابدرێن.
Wednesday, November 4, 2015
راوێژكارى ئه‌نجوومه‌نى ئاسایشى هه‌رێم پێشوازیی له وه‌زیری ده‌ره‌وه‌ی تو...
ئه‌مڕۆ چوارشه‌ممه 4/11/2015 به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازیی لە فەرەیدوون سینیرلی ئۆغڵو وەزیری دەرەوەی توركیا و شاندێكی یاوەری كرد، كه له ژماره‌یه‌ك دیپلۆماتكار پێكهاتبوو.
لە دیدارێكدا وه‌زیری ده‌ره‌وه‌ی توركیا خۆشحاڵیی خۆی بە سەردانی هەرێمی كوردستان و ئه‌و دیداره دەربڕی. له‌به‌رامبه‌ردا راوێژكاری ئه‌نجوومه‌نی ئاسایشی هه‌رێمی كوردستان سوپاسی ئەو سەردانەی كرد و پیرۆزبایی خۆی ئاڕاستەی خەڵكی توركیا كرد، كە سەركەوتووانە كۆتاییان بە پرۆسەی هەڵبژاردنی گشتی وڵاتەكەیان هێنا.
هه‌ر له دیداره‌كه‌دا دوا ره‌وشی سیاسی و ئه‌منی و شه‌ڕی تیرۆریستانی داعش و پرۆسه‌ی ئاشتی له ده‌ڤه‌ره‌كه و توركیا تاوتوكرا و دووپات له به‌رده‌وامبوون و زیاتر گه‌شه‌پێدانی په‌یوه‌ندییه‌كانی نێوان هه‌رێمی كوردستان و توركیا له هه‌موو بواره‌كان كرایه‌وه، كه له به‌رژه‌وه‌ندی گه‌لانی هه‌ردوولادا هه‌یه.
Wednesday, September 30, 2015
مه‌سرور بارزانی پێشوازیى له كونسوڵی گشتیی سودان له هه‌رێمى كوردستان كر...
مەسرور بارزانی پێشوازیی لە کونسولی گشتیی سودان کرد
ئەمرۆ 30-09-2015 مەسرور بارزانی راوێژکاری ئەنجوومەنی ئاسایشی هەرێمی کوردستان پێشوازیی لە بەرێز یاسین عێوەز کۆنسولی گشتیی سودان لە هەرێمی کوردستان و شاندی یاوەری کرد.
لە دانیشتنێکدا کونسولی سودان تیشکی خستە سەر گرینگیی پەیوەندییەکانی هەرێم و وڵاتی سودان و ئاماژەی بەوەدا کە وڵاتەکەیان وەک فاکتەرێکی گرینگی سەقامگیری دەڕوانێتە هەرێمی کوردستان و بۆیە بەلایانەوە گرینگە پەرە بە پەیوەندییەکانیان لەگەل هەرێمی کوردستان بدەن. هەر لەم بوارەدا کۆنسولی سودان ئاماژەی بەوە کرد کە هەرێمی کوردستان بووەتە دورگەیەکی ئارام بۆ پەنابەرانی سوریا و ئاوارەکانی ناوخۆی عێراق و بەو چەندەش هەرێمی کوردستان سەروەرییەکی مێژوویی تۆمار کردووە. هەروەها بەرێز عەوێز ڕۆڵی دەزگا ئەمنییەکانی هەرێمی بە بەرز نرخاند کە توانیویانە ئاسایشی هەرێمی کوردستان لەم ناوچە پڕ لە کێشەیە بپارێزن.
راوێژکاری ئەنجوومەنی ئاسایشی هەرێمی کوردستان ئاماژەی بەوەدا کە هەرێمی کوردستان بە بایەخەوە دەڕوانێتە پەیوەندییەکانی لەگەل وڵاتانی کیشوەری ئەفریقییا و لەم نێوەندەشدا چاوەڕوانی ئەوەیان لە گشت وڵاتانی دۆست هەیە کە لە جەنگی دژ بە داعش یارمەتیی هەرێمی کوردستان بدەن، چونکە داعش مەترسییەکی نێودەوڵەتییە بۆیە دەبێت گشت وڵاتان هاوکار بن بۆ ڕووبەڕووبوونەوەی ئەو هەڕەشەیە.
لە کۆتاییدا هەردوو لا جەختیان لەسەر ئەوە کردەوە کە کێشەکانی ناوخۆی عێراق و ناوچەکە بە شێوەیەکی ئاشتیانە چارەسەر بکرێن. لەم بوارەشدا کۆنسولی گشتی سودان ئاماژەی بە ئەزموونی وڵاتەکەیان لەگەل باشووری سودان کرد و ئاواتی خواست کە لەم دەڤەرەشدا بە بە لێکتێگەیشن و سینگفراوانییەوە گەلانی ناوچەکە رێز لە ویست و ئیرادەی یەکتر بگرن.
Tuesday, September 29, 2015
راوێژكارى ئه‌نجوومه‌نى ئاسایشى هه‌رێم پێشوازیی له كونسوڵی گشتی ئه‌مریكا...
راوێژكارى ئه‌نجوومه‌نى ئاسایشى هه‌رێم پێشوازیی له كونسوڵی گشتی ئه‌مریكا له هه‌ولێر كرد
ئه‌مڕۆ سێشه‌ممه 29/9/2015 به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له به‌ڕێز (ماتیاس میتمان) كونسوڵی گشتی ئه‌مریكا له هه‌ولێر و شاندێكی یاوه‌ری كرد.
له دیدارێكدا گفتوگۆ له‌باره‌ی دۆخی مه‌یدانی به‌ره‌كانی شه‌ڕی تیرۆریستانی داعش و یارمه‌تی سه‌ربازی بۆ هێزی پێشمه‌رگه و په‌ره‌سه‌ندنه سیاسیه‌كانی هه‌رێمی كوردستان و به‌رده‌وامی هه‌ماهه‌نگی نێوان هاوپه‌یمانی نێوده‌وڵه‌تی دژی داعش كرا بۆ ئه‌و هێرشانه‌ی له داهاتوو دژ به رێكخراوی تیرۆریستی داعش ئه‌نجام ده‌درێن و هه‌ردوولا دووپاتیان له به‌هێزكردنی زیاتری توانای هێزی پێشمه‌رگه كرده‌وه.
له‌وباره‌وه مه‌سرور بارزانی نیگه‌رانی خۆی به‌رامبه‌ر كه‌موكوڕی له یارمه‌تییه سه‌ربازییه‌كان و بودجه له‌لایه‌ن حكوومه‌تی عێراقی فیدراڵ ده‌ربڕی و رایگه‌یاند، عێراق پابه‌نده ده‌ستوورییه‌كانی به‌رامبه‌ر هه‌رێمی كوردستان و هێزی پێشمه‌رگه جێبه‌جێ نه‌كردووه. هه‌روه‌ها ئاماژه‌ی به‌و باره دارییه گرانه دا، كه له ئه‌نجامی هاتنی ئاواره و په‌نابه‌ره ناوخۆییه‌كان وه‌ك په‌ناگه‌یه‌كی ئارام له هه‌رێمی كوردستان دروست بووه.
له‌باره‌ی كه‌موكوڕی یارمه‌تییه سه‌ربازییه‌كانه‌وه كونسوڵی گشتی ئه‌مریكا له هه‌ولێر رایگه‌یاند، سوپای ویلایه‌ته یه‌كگرتووه‌كان كارده‌كات بۆ رێكخستنی گواستنه‌وه‌ی كاروانی یارمه‌تیی و پێداویستییه سه‌ربازییه‌كان له هاوپه‌یمانی نێوده‌وڵه‌تییه‌وه بۆ هێزه‌كانی پێشمه‌رگه بۆئه‌وه‌ی وه‌ك هێزێكی كاریگه‌ر و كارا بمێنێته‌وه.
له‌باره‌ی په‌ره‌سه‌ندنه سیاسییه‌كانی هه‌رێمی كوردستان هه‌ردوولا جه‌ختیان له گرنگی گه‌یشتن به چاره‌سه‌رێكی گشتی له رێگه‌ی دیالۆگ و سازان كرده‌وه.
Tuesday, September 15, 2015
راوێژكارى ئه‌نجوومه‌نى ئاسایى هه‌رێمى كوردستان پێشوازیی له باڵیۆزی ئوست...
ئه‌مڕۆ سێشه‌ممه 15/9/2015 به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له به‌ڕێز كریستۆفه‌ر لانگمان بالیۆزی ئوسترالیا له عێراق و شاندێكی یاوه‌ری كرد. له دیدارێكدا، كه به ئاماده‌بوونی بریكاری بالیۆز به‌ڕێوه‌چوو دوا پێشهاته‌كان و ره‌وشی سیاسی و ئه‌منی عێراق و ناوچه‌كه به گشتی و شه‌ڕی تیرۆریستانی داعش خرانه به‌رباس و گفتوگۆ.
وێرای به‌خێرهێنانی شاندی میوان، مه‌سرور بارزانی سوپاسی گه‌ل و حكوومه‌تی ئوسترالیای كرد بۆ پێشكه‌شكردنی هاوكاری و یارمه‌تیه‌كانی بۆ هێزه‌كانی پێشمه‌رگه و رایگه‌یاند، ئێمه پێویستیمان به یارمه‌تی راسته‌وخۆی ئوسترالیا هه‌یه.
هه‌روه‌ها ئاماژه‌ی به ئه‌زموون و شاره‌زایی هێزه‌كانی پێشمه‌رگه و خاڵه گرنگه‌كانی سنورداركردنی جموجۆل و تواناكانی تیرۆریستانی داعش كرد و گوتی: پێویسته كۆمه‌ڵگه‌ی نێوده‌وڵه‌تی له هه‌موو بواره‌كاندا به‌رامبه‌ر هێزه‌كانی پێشمه‌رگه، كه له گۆڕه‌پانی شه‌ڕی داعشدان هاوكاری و پشتیوانییه‌كانی زیاتر و كاراتر بكات.
له‌به‌رامبه‌ردا بالیۆزی ئوسترالیا له عێراق ئاماژه‌ی به هاوكارییه‌كانی وڵاته‌كه‌ی بۆ هێزی پێشمه‌رگه كرد و رایگه‌یاند، ئێمه ئه‌وه باش ده‌زانین، كه پێشمه‌رگه هێزێكی كاریگه‌ره و ئه‌ركێكی گرنگ جێبه‌جێده‌كات، ئێمه له هاوكارییه‌كانماندا به‌رده‌وام ده‌بین. هه‌روه‌ها ئه‌وه‌شی خسته‌ڕوو، كه حكوومه‌تی وڵاته‌كه‌ی هه‌وڵه‌كانی خۆی بۆ سنوورداركردنی جموجۆلی ئه‌و گومانلێكراوانه چڕ كردۆته‌وه، كه ده‌یانه‌وێ په‌یوه‌ندی به‌و رێكخراوه تیرۆریستییه بكه‌ن.
هه‌ر له دیداره‌كه‌دا گفتوگۆ له‌باره‌ی پرۆسه‌ی سیاسی عێراق و گرنگی رزگاركردنی گشت ناوچه‌كانی دیكه‌ی عێراق كرا و دووپات له‌وه كرایه‌وه، كه پێویسته پێكهاته‌كان له ئاینده‌ی سیاسی خۆیان دڵنیا بكرێنه‌وه و مه‌سرور بارزانی رایگه‌یاند، كورد هیچ كاتێك نایه‌وێ به‌شێك بێت له ململانێی تایفی و بوونی هێزێكی نیشتمانیی بۆ پرۆسه‌ی رزگاركردنی ناوچه‌كانی دیكه له تیرۆریستاندا گرنگ و كاریگه‌ره.
له كۆتاییدا راوێژكاری ئه‌نجوومه‌نی ئاسایشی هه‌رێمی كوردستان هیوای فره‌وانكردن و به‌هێزتركردنی په‌یوه‌ندییه دووقوڵییه‌‌كانی نێوان هه‌رێمی كوردستان و ئوسترالیای له گشت بواره‌كاندا خواست.
Subscribe to:
Posts (Atom)