مەسروور بارزانی له به‌رده‌وامیی پێشێلكارییه ده‌ستوورییه‌كان بێده‌نگ نابین
مه‌سروور بارزانی، راویژكاری ئه‌نجوومه‌نی ئاسایشی هه‌رێمی كوردستان، لە بارەی کێشەکانی نێوان هەولێر و بەغدا رایگه‌یاند: "هەرێمی کوردستان خوازیارە بە پێی دەستوور گشت کێشەکان چارەسەر بکرێن".
هه‌روه‌ها گوتی: "ئەگەر پێشێلکارییە دەستوورییەکان بەردەوام بن ناتوانین بێ دەنگ بین و هەرێمی کوردستان بژاردەی دەستووریی زۆری لە بەردەمدایە بۆ ئەوەی داکۆکی لە مافەکانی بکات".
گوته‌كانی راوێژكاری ئه‌نجوومه‌نی ئاسایشی هه‌رێمی كوردستان، له چوارچێوه‌ی دیدارێكدا هات، له‌گه‌ڵ برادلی ساودن، باڵیۆزی نیوزلەندا لە عێراق و له دیداره‌كه‌دا، دوا رەوشی ناوچەکە و پەیوەندییەکانی هەرێم و بەغدا و بەردەوامیی هەماهەنگیی زیاتر لە چوارچێوەی هەوڵە نێودەوڵەتییەکانی دژ بە تیرۆر تاووتوێ کران.
باڵیۆزی نیوزلەندا وێڕای ستایشی رۆڵی هەرێم و هێزی پێشمەرگە لە جەنگی دژ بە تیرۆریستان، ئامادەیی وڵاتەکەی بۆ فراوانکردنی پەیوەندی دوولایەنەی نێوان هەرێم و نیوزلەندا دەربڕی و ئاواتی خواست هەرچی زووتره کێشەکانی هەولێر و بەغدا کۆتاییان پێبێت، تاکو زەمینەی لەبارتر بۆ ئاشتی و سەقامگیری و بووژانەوەی ئابووری بڕەخسێت.
لە بەرامبەردا مەسروور بارزانی، جەختی لە سەر بەردەوامیی هەرێمی کوردستان لە جەنگی دژ بە تیرۆریستان لە چوارچێوەی هاوپەیمانی نێودەوڵەتی کردەوە و گووتی: "هەرێمی کوردستان وێڕای هەموو کۆسپ و تەگەرەکان لە ریزی پێشەوەی بەرەی دژ بە تیرۆریستان دەمێنینەوە".
No comments:
Post a Comment