مه‌سروور بارزانی: بەغدا خۆی لە جێبەجێکردنی کۆی دەستوور ده‌دزێته‌وه
مەسروور بارزانی جەخت لە سەر دانوستانەکان لە سەر بنەمای جێبەجێكردنی دەستوور ده‌كاته‌وه‌و و رایگه‌یاند: "هەرێمی کوردستان ئەرکە دەستوورییەکانی جێبەجێ کردووە، بەڵام لە بەغدا خۆدزینەوە لە جێبەجێکردنی کۆی دەستوور وەک یەك پەکێج هەیە. هه‌روه‌ها دەبێت کۆمەڵگای نێودەوڵەتی کاراتر ئەرکەکانی لە ناوچەکەدا جێبەجێ بکات تاکو زەمینە بۆ سەرهەڵدانی توندوتیژی و گەشەکردنەوەی تیرۆر نەرەخسێتەوە.
ئه‌مڕۆ 5/3/2018 مه‌سروور بارزانی راوێژكاری ئه‌نجوومه‌نی ئاسایشی هه‌رێمی كوردستان له‌گه‌ڵ تۆن ئالەرس، باڵیۆزی نوێی نەرویج بۆ ئوردن و عێراق كۆبووه‌وه‌و له كۆبوونه‌وه‌كه‌دا باڵیۆزه‌كه‌ی نه‌رویج پێزانینی وڵاتەکەی بۆ هەرێمی کوردستان و قوربانیدانی هێزی پێشمەرگە لە جەنگی دژ بە تیرۆر راگەیاند و ئاماژەی بەوەدا کە نەرویج بە گرنگییەوە دەڕوانێتە ڕۆڵی هەرێمی كوردستان لە ناوچەکەدا و خوازیاری فراوانترکردنی زیاتری پەیوەندیی دوولایەنەیه لەگەڵ هەرێمی کوردستانن.
باڵیۆزی نەرویج پشتگیری وڵاتەکەیشی بۆ دانووستانی نێوان هەولێر و بەغدا دووپاتکردوە و ئاواتی خواست هەرچی زووتر ئەم دانوستانانە ئەنجامی ئەرێنیی لێ بکەوێتەوە.
راوێژکاری ئەنجوومەنی ئاسایشی هەرێمی کوردستان هیوای سەرکەوتنی بۆ خاتوو ئالەرس لە پۆستە نوێیەکەیدا خواست و ستایشی وڵاتی نەرویجی کرد بۆ ئەو پاڵپشتی و هاوکاریانەی کە لە چوارچێوەی هاپەیمانیی نێودەوڵەتی دژ بە داعشدا پێشکەشی هەرێمی کوردستانیان کردووە.
No comments:
Post a Comment