وەزیری دەرەوەی تورکیا پاڵپشتی وڵاتەکەی بۆ مەسرور بارزانی راگەیاند

Masrour barzaniدیداری نێوان مه‌سرور بارزانی و وه‌زیری ده‌ره‌وه‌ی توركیا


مەسرور بارزانی راوێژكاری ئەنجوومەنی ئاسایشی ھەرێمی كوردستان و مەولود چاوشئۆغلو وەزیری دەرەوەی توركیا کۆبوونەوە و باسیان لە پەیوەندییەکانی نێوان هەولێر و ئەنقەرە کرد.

لە کۆبوونەوەکەدا، کە باڵیۆزی تورکیا لە عێراق و کونسوڵی گشتی تورکیا لە هەولێر و ژمارەیەک راوێژکار و بەرپرس لەهەردوولا ئامادەبوون، پێشهات و پەرەسەندنە سیاسی و ئەمنیەکانی ناوچەکە و پەرەپێدانی پەیوەندییەکانی نێوان هەولێر و ئەنقەرە تاوتوێ کران.

وەزیری دەرەوەی تورکیا هیوای سەرکەوتنی بۆ مەسرور بارزانی لە سەرۆکایەتی کردنی کابینەی داھاتووی حکومەتی ھەرێمدا خواست و ئامادەیی وڵاتەکەشی بۆ هاوکاریکردن و پەرەپێدانی پەیوەندی دوو قۆڵی نێوان هەردوولا لە گشت بوارەکاندا دەربڕی.

لە بەرامبەردا مەسرور بارزانی ویستی ھەرێمی کوردستانی بۆ پەرەپێدانی زیاتری پەیوەندییە ھەمەچەشنەکان، لەگەڵ تورکیا خستەڕوو ئاماژەی بەوە دا کە ھەرێمی کوردستان و عێراقیش پێویستییان بە پاڵپشتی و یارمەتیی دراوسێکان ھەیە ، بە تایبەت بۆ ئاوەدانکردنەوە و پێشخستنی رەوشی ئەو دەڤەرانەی لە ئەنجامی شەری دژ بە تیرۆریستان زیانمەند بوونە.

پەرەپێدانی پەیوەندی بازرگانی و دۆسیەی ئاسایشی ناوچەیی و ھەڕەشەکانی تیرۆر لە دەڤەرەکەدا تەوەرێکی دیکەی کۆبوونەوەکەی نێوان مەسرور بارزانی و مەولود چاوشئۆغڵو، بوون.

شەوی رابردوو 28/4/2019، مەولود چاوشئۆغڵو وه‌زیری ده‌ره‌وه‌ی توركیا له‌ رێگه‌ی فڕۆكه‌خانه‌ی نێوده‌وڵه‌تی هه‌ولێره‌وه‌ گه‌یشته‌ هه‌رێمی كوردستان و لەلایەن نێچیرڤان بارزانی سەرۆكی ئەنجوومەنی وەزیرانی ھەرێمی كوردستانەوە پێشوازی لێكرا.

Masrour barzani مەسرور بارزانی: پێویستە دۆخی ناوچە کوردستانییەکان ئاسایی بکرێتەوە

ئەمڕۆ سێشەممە 23/4/2019، مەسرور بارزانی، راوێژکاری ئەنجومەنی ئاسایشی هەرێمی کوردستان لەگەڵ ولیام رۆبوك، جێگری نێرده‌ی تایبه‌تی سه‌رۆكی ئه‌مەریكا بۆ ھاوپه‌یمانیی جیهانیی دژی داعش کۆبووەوە و باسیان لە رەوشی ناوچەکە و هەڕەشەکانی تیرۆر کرد.

لە کۆبوونەوەکەدا، کە ستیڤ فه‌یگن، كونسوڵی گشتیی ئه‌مەریكا له‌  هەولێر ئامادە بوو، دوا پەرەسەندنەکانی عێراق، هەرێمی کوردستان، ناوچەکە و رووبه‌ڕووبوونه‌وه‌ی هەڕەشەی تیرۆریزم گفتوگۆیان لەسەر کرا.

مەسرور بارزانی، بۆچوونی خۆی لەبارەی جموجۆڵی بەردەوامی داعش لە هەندێ ناوچەی عێراق روون کردەوە و جه‌ختی له بایەخی چارەسەرکردنی رەوشی ناوچەکانی دەرەوەی ئیدارەی حکوومەتی هەرێمی کوردستان کردەوە و رایگەیاند "پێویستە هەرچی زووترە زەمینەی لەبار بۆ ئاساییکردنەوەی دۆخی ئەو ناوچانە بڕەخسێندرێ".

هەروەها باسی هاتنە ئارای کەشێکی ئەرێنی لە پەیوەندیی نێوان هەولێر و بەغدا کرد و روونی کردەوە، ئەم کەشە یارمەتیدەر دەبێت بۆ هەڵگرتنی هەنگاوە پێویستەکان بە ئاراستەی چارەسەرکردنی تەواوی پرسە هەڵواسراوەکان، کە کاریگەریان بەسەر سەقامگیری دەبێت.

له‌ به‌رامبه‌ردا جێگری نێرده‌ی تایبه‌تی سه‌رۆكی ئه‌مەریكا بۆ ھاوپه‌یمانیی جیهانیی دژی داعش، پشتگیریی وڵاتەکەی بۆ هێزی پێشمەرگە و هەماهەنگیی نێوان هێزە پەیوەندیدارەکان و هێزەکانی هاوپەیمانان دووبارە کردەوە و رایگەیاند "پەرەپێدانی ئەو هەماهەنگییانە بۆ  رێگریکردن لە پەرەسەندنی جموجۆڵەکانی تیرۆریستان لە عێراقدا پێویسته‌".

هەر لەو کۆبوونەوەیەدا گفتوگۆکانی نێوان وەزارەتی پێشمەرگە و وەزارەتی بەرگریی عێراق و قۆناغەکانی شەڕی داعش لە سووریا تاوتوێ کران.

مه‌سرور بارزانی: پێویستە پەلە بكرێت لە ئاساییكردنەوەی دۆخی ناوچە كوردستانییەكان

 ئه‌مڕۆ دووشەممە 15/4/2019 مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان، پێشوازی له‌ (جه‌نه‌ڕاڵ پاتریك رۆبه‌رسۆن) فه‌رمانده‌ی گشتی تیمی هاوبه‌شی ئۆپه‌راسیۆنه‌ تایبه‌تیه‌كان له‌ عێراق و سووریا و شاندی یاوەری كرد.

له‌م دیدارەدا پێشهاتەکانی ناوچه‌كه‌ به‌گشتی و هەماهەنگی لە بواری ڕووبەڕووبوونەوەی ھەڕەشەکانی تیرۆریستان تاوتوێكرا. 

مەسرور بارزانی لە ئاماژەیەکدا بۆ پەرەسەندنی ھەرەشەی تیرۆریستان لە ھەندێ ناوچەی عێراق، پێویستی بەردەوامیی ھەماھەنگی ھەمەلایەنەی دووپات کردەوە و خوازیاری پەلەکردن بوو لە ئاسایی کردنەوەی دۆخی ناوچە کوردستانییەکانی دەرەوەی ئیدارەی هەرێم بە مەبەستی پارێزگاریکردن لە دەستکەوتەکان و گێڕانەوەی سەقامگیری و بەرتەسککردنەوەی جمووجۆڵی تیرۆریستان لەو ناوچانە.

لەلای خۆیەوە، فه‌رمانده‌ی گشتی تیمی هاوبه‌شی ئۆپه‌راسیۆنه‌ تایبه‌تیه‌كان له‌ عێراق و سووریا وێڕای ئاماژەدان بە کاریگەری رۆڵی هێزەکانی پێشمەرگە لە رووبەڕووبوونەوەی تیرۆریستان، رۆڵ و هەماهەنگیی نێوان هێزەکانی ئەمریکا و عێراق و هەرێمی کوردستان بۆ سەقامگیرکردنەوەی ناوچەکە بە پێویست و کاریگەر زانی.

Masrour barzaniمەسرور بارزانی و سەرۆکی دەستەی خێرخوازی ئیسلامی جیهانی کۆبوونەوە

مەسرور بارزانی رۆڵی دەستەی خێرخوازی ئیسلامی جیهانی بەرز دەنرخێنێت

مەسرور بارزانی، راوێژکاری ئەنجوومەنی ئاسایشی هەرێمی کوردستان پێشوازی لە د. عەبدوڵا ئەلمەعتوق سەرۆکی دەستەی خێرخوازی ئیسلامی جیهانی و شاندی یاوەری کرد.

لە دیدارێکدا، کە کونسوڵی گشتی دەوڵەتی کوێت ئامادەبوو، سەرۆکی دەستەی خێرخوازی ئیسلامی جیهانی، وێڕای سوپاسکردنی هەرێمی کوردستان بۆ لە باوەشگرتنی ئەو ژمارە زۆرەی ئاوارە و پانابەرانی ناوخۆ و دەرەوە، پوختەیەکی لەبارەی یارمەتییە فریاگوزارییەکانی دەستەکە لە هەرێمی کوردستان خستەڕوو، کە بەهاوکاری دەزگای خێرخوازی بارزانی بەسەر ئاوارە و پەنابەرەکان دابەشکراون.

د. عەبدوڵا لەبارەی کاری دەستەکەیان رایگەیاندووە: "دەستەکەیان خزمەتگوزاری پێشکەشی ئەوانە دەکات، کە پێویستیانە، بە تایبەتی منداڵانی بێ باوک و خانەوادە بێ سەرپەرشتەکان بۆ ئەوەی لە قۆناغی پێویستییەوە بەرەو قۆناغی بەرهەمهێنان بچن".

لەبەرامبەردا مەسرور بارزانی ئامادەیی هەرێمی کوردستانی بۆ هەموو ئاسانکارییەک لە هەر کارێکی خێرخوازی دەربڕی و رۆڵی دەستەی خێرخوازی ئیسلامی جیهانی لە دابینکردنی فریاگوزارییە مرۆییەکان بەرز نرخاند و رایگەیاند، هەرێمی کوردستان سەرباری ئەو بارگرانییەی بەهۆی بڕینی بودجە و شەڕی داعش لەسەری بوو، بەڵام باوەشی بۆ ئاوارەکان کردەوە و ئەوەی لە توانایدا هەبوو بێ جیاوازی پێشکەشی کردن.

میکانیزمەکانی پەلەکردن لە پێشکەشکردن و دابینکردنی پێداویستییە سەرەتاکانی ژیان لەلایەن لایەنە پەیوەندیدارە نێودەوڵەتییەکان و دەزگا خێرخوازییە جیهانییەکان بۆ کەمپەکانی ئاوارەکان لە هەرێمی کوردستان لایەنێکی دیکەی دیدارەکە بوو.

Masrour barzani مەسروور بارزانی پێویستە مافی تەواوی پێکهاتەکان لە سووریای نوێ لەبەرچاو بگیرێت

فەرەنسا پشتیوانی لە کابینەی داهاتووی حکوومەتی هەرێمی کوردستان دەکات

ئەمڕۆ سێشەممە 2/4/2019 مەسرور بارزانی راوێژکاری ئەنجوومەنی ئاسایشی هەرێمی کوردستان لە کۆبوونەوەی لەگەڵ برۆنۆ ئۆبرت، باڵیۆزی فەرەنسا لە عێراق، جەختی لە دۆستایەتی گەلی کوردستان و فەرەنسا کردەوە.

لەم دیدارەدا، کە کونسوڵی گشتی فەرەنسا لە ھەولێر ئامادەبوو، دوا پێشهاتەکانی عێراق و ناوچەکە تاوتوێکران و دووپات لە پەرەپێدانی پەیوەندیی دۆستانەی نێوان هەردوو گەلی فەرەنسا و كوردستان كرایەوە.

مەسرور بارزانی  پشتیوانی و یارمەتییەکانی فەرەنسای بۆ هەرێمی کوردستان بەرزنرخاند، کە بەردەوام  لە قۆناغە جیاکاندا هاوكار و پشتیوانی گەلی كوردستان بووە.

هەروەها باسی لە هەنگاوەکانی پێکھێنانی کابینەی نوێی حکوومەتی هەرێمی کوردستان لە لایەک و پێشڤەچوونەکانی پەیوەندی نێوان ھەرێمی کوردستان و بەغدا کرد و هەنگاوەکانی بە ئەرێنی وەسفکرد.

هەر لەو دیدارەدا بارودۆخی سوریا و کۆنترۆڵکردنەوەی دوا مۆڵگەی داعش و هێورکردنەوەی گرژییەکان و چارەسەری سیاسیانەی کێشەکانی ئەو وڵاتە تاوتوێکرا و جەخت لەوە کرایەوە، کە پێویستە لە هەنگاوەکانی داهاتوودا  قوربانی و مافی هەموو پێکهاتەکان لەبەرچاوبگرێت.

لەلای خۆیەوە باڵیۆزی فەرەنسا لە عێراق وێڕای بەئاوات خواستنی سەرکەوتن بۆ مەسرور بارزانی لە سەرۆکایەتی کردنی کابینەی داهاتووی حکوومەتی هەرێمی کوردستان، دووپاتی لە فراوانکردنی پەیوەندییەکانی نێوان هەردوولا کردەوە و رایگەیاند، وڵاتەکەی لە پشتیوانی و هاوکاری هەرێمی کوردستان و پێشمەرگە  بەردەوام دەبێت.

مەسرور بارزانی پێشوازیی لە شاندێکی باڵای وەزارەتی دەرەوەی تورکیا كرد

مەسرور بارزانی، راوێژکاری ئەنجومەنی ئاسایشی هەرێمی کوردستان پێشوازیی لە سداد ئونال، جێگری وەزیری دەرەوەی تورکیا و شاندی یاوەری کرد.

لەو دیدارەدا، دوا پەرەسەندنەکانی ناوچەکە و پەیوەندییە دووقۆڵییەکان و هەوڵ و هەنگاوەکانی پێکهێنانی کابینەی نوێی حکوومەتی هەرێمی کوردستان و پرسە هاوبەشەکان، تاوتوێ کران.

مەسرور بارزانی، خواستی هەرێمی کوردستانی بۆ پەرەپێدانی پەیوەندییەکانی نێوان تورکیا و هەرێمی کوردستانی لە گشت بوارەکان دووپات کردەوە، بە شێوەیەک كه‌ لە بەرژەوەندیی هەردوولا بێت و خزمەت بە ئاشتی و سەقامگیری و دراوسێیەتیی باش بکات. 

لەلای خۆیەوە جێگری وەزیری دەرەوەی تورکیا ئاواتی سەرکەوتنی بۆ مەسرور بارزانی خواست لە سەرۆکایەتیکردنی کابینەی داهاتووی حکوومەتی هەرێمی کوردستان و ویستی حکوومەتی وڵاتەکەی بۆ پێشخستنی پەیوەندییە ئابوری و بازرگانییەکان لەگەڵ هەرێمی کوردستان، وەک دراوسێ و دەروازە بۆ ناوچەکانی دیکەی عێراق دەربڕی.

گفتوگۆکردن لەبارەی پەرەسەندن و پێشهاتەکانی ناوچەکە و رەوشی ئاسایشی ناوچە سنوورییەکان و رۆڵی کۆمپانیاکانی تورکیا لە هەرێمی کوردستان، تەوەرێکی دیکەی دیدارەکە بوون.

Masrour barzani مەسرور بارزانی و شاندێكی باڵای ھاوپەیمانی نێودەوڵەتی كۆبوونەوە

مەسرور بارزانی داوای پاڵپشتیی زیاتر بۆ هێزی پێشمەرگە دەکات

لە کۆبوونەوەیەکی لەگەڵ شاندێکی باڵای سەربازیی هاوپەیمانان، مەسرور بارزانی، راوێژکاری ئەنجومەنی ئاسایشی هەرێمی کوردستان، بەردەوامیی پاڵپشتییەکانی هاوپەیمانان بۆ هێزی پێشمەرگە بە گرنگ دەزانێت.

ئەمرۆ چوارشەممە 13/3/2019، مەسرور بارزانی، راوێژکاری ئەنجومەنی ئاسایشی هەرێمی کوردستان پێشوازیی لە شاندێکی باڵای سەربازیی هاوپەیمانان بۆ بواری چاکسازی و مەشق و راھێنانی ھێزی پێشمەرگە کرد و داوای پاڵشتیی زیاتری بۆ هێزەکانی پێشمەرگە کرد.

له‌ دیدارێكدا، وێڕای هەڵسەنگاندن بۆ دوا میکانیزم و بەڕێوەچوونی پرۆسەی چاکسازیی و رێکخستنەوەی وەزارەتی پێشمەرگە، ئەگەری سەرهەڵدانەوەی داعش و پەرەسەندنی جمۆجۆڵەکانیان تاوتوێ کرا.

لەم بارەوە، مەسرور بارزانی سوپاسی هەوڵەکانی هاوپەیمانی کرد و هیوای به‌رده‌وامیی هاوكارییەکانی خواست، به ‌تایبه‌تی له‌ بواری چاكسازی و رێكخستنه‌وه‌ی وه‌زاره‌تی پێشمه‌رگه‌دا.

هەروەها، مەسرور بارزانی، بۆ رێگەگرتن لە مەترسی و هەڕەشەکانی تیرۆریستان، هاوکاریی هەمەلایەنە و رەخساندنی زەمینەی لەباری بۆ ئاساییکردنەوە و چارەسەریی کێشە سیاسی و ئیداری و دەستوورییەکانی بە پێویست زانی .

لای خۆیانه‌وه‌، شاندی میوان، وێڕای جه‌ختكردنه‌وه‌ له هاوکاریی زیاتری هێزی پێشمەرگە بۆ بەرەوپێشبردنی پرۆسەی چاکسازی و رێکخستنەوەی وەزارەتی پێشمەرگە، پشتگیریی خۆیان بۆ هەماهەنگیی نێوان هێزی پێشمەرگە و هێزی هاوپەیمانان و هێزە عێراقییەکان لە گشت ناوچەکان راگەیاند.