مه‌سرور بارزانی: بۆ باشترکردنی بژێوی هاووڵاتیان ده‌رفه‌تی زیاتر بۆ سه‌رمایه‌گوزاریی بیانی ده‌ڕه‌خسێنین
ئه‌مڕۆ پێنجشه‌ممه 31/1/2019 مەسرور بارزانی راوێژکاری ئەنجوومەنی ئاسایشی هه‌رێمی كوردستان، پێشوازی له شاندێكی بانكی نێوده‌وڵه‌تی به سه‌رۆكایه‌تی مه‌رزه حه‌سه‌ن به‌ڕێوه‌به‌ری جێبه‌جێكار و ڕاگری ئه‌نجومه‌نی كۆمه‌ڵه‌ی بانكی نێوده‌وڵه‌تی كرد.
له‌و كۆبوونه‌وه‌یه دوا پەرەسەندن و پێشهاته‌كان و بارودۆخی ئابووری و گفتوگۆكانی نێوان هه‌ولێر و به‌غدا تاوتوێکران.
مەسرور بارزانی، وێڕای تیشکخستنە سەر بەرقەراربوونی ئاسایش وەک فاکتۆرێکی بەهێزی گەشەی ئابوری و هەوڵەکانی پەرەپێدان و چاکسازی، ئاماژەی بە شوێنەوار و کاریگەرییەکانی شەڕی تیرۆستان و قەیرانەکان بەسەر پێشکەوتنی وڵات و بژێوی هاووڵاتیانەوە کرد.
لەم سۆنگەوە هاریكاری بانکی نێودەوڵەتی بۆ هەرێمی کوردستان له گشت بواره‌كاندا بەپێویستزانی و رایگەیاند، هەرێمی کوردستان لە بردنەپێشەوەی کارایی دامودەزگاکانی و رەخساندنی دەرفەتی زیاتر بۆ سه‌رمایه‌گوزار و وەبەرهێنەرانی بیانی به‌مه‌به‌ستی گەشە و باشترکردنی بژێوی هاووڵاتیانی هه‌رێمی كوردستان له ڕیفۆرمه ئیداری و داراییە‌كان و پێداچوونەوە بە رێکارەکانی پەیوەندیدار بەم بوارانە به‌رده‌وام دەبێت.
له‌لای خۆیەوە شاندی میوان ئاماده‌یی خۆیان بۆ هاریكاری و هه‌مه‌هانگی هه‌رێمی كوردستان له بوارەکانی دارایی و به‌ڕێوه‌بردن و په‌ره‌پێدان و پرۆژه ستراتیژییه‌كان نیشاندا.
