مەسرور بارزانی: پێویستە ھەولێر و بەغدا بەربەستی کێشە لەمێژینەکان تێبپەڕێنن

مەسرور بارزانی: پێویستە ھەولێر و بەغدا بەربەستی کێشە لەمێژینەکان تێبپەڕێنن

ئەمڕۆ شەممە 15/12/2018 مەسروور بارزانی راوێژکاری ئەنجوومەنی ئاسایشی هەرێمی کوردستان لەمیانی دیدارێكدا له‌گه‌ڵ محەمەد ئەلحەلبوسی سەرۆکی ئەنجوومەنی نوێنەرانی عێراقی فیدراڵ و شاندی یاوەری گووتی: "پێویستە بەربەستی کێشە لەمێژینەکان تێپەڕێنین و بە جۆرێک چارەسەر بکرێن کە ئیتر رێگە لە دووبارەبوونەوەیان بگیرێت و تەنیا بەو شێوەیە دەتوانین بەرەو داهاتوویەکی گەش و پێشکەوتنی وڵات هەنگاو بنێین".

لە دیدارێکدا دوا پەرەسەندن و ئاستەنگەکانی بەردەم پرۆسەی سیاسیی عێراق و پەیوەندی نێوان بەغدا و هەولێر تاوتوێ کران و راوێژكاری ئه‌نجوومه‌نی ئاسایشی هه‌رێمی كوردستان، جەختی لە سەر خواستی هەرێمی کورستان بۆ چارەسەریی گشت کێشەکان لە چوارچێوەی دەستووری عێراق کردەووە".

لای خۆیه‌وه‌ سەرۆکی ئەنجوومەنی نوێنەرانی عێراق هیوای سەرکەوتنی بۆ مەسروور بارزانی لە سەرۆکایەتیی کابینەی داهاتووی حکومەتی هەرێمی کوردستان خواست و ئامادەیی خۆی بۆ هەماهەنگی و هاوکاریی زیاتر دەربڕی.

هەر لەو دیدارەدا ئەرکی ئەم خولەی ئەنجوومەنی نوێنەران لە بەدواداچوونی پرسەکان بە گشتی، بەتایبەتی پرسی بودجە و دابین کردنی بەشە بودجەی هەرێم بە شێوەیەکی دادپەروەرانە و مادەی 140 گفتوگۆی لەبارەوە کرا.

هەماهەنگی نێوان هێزە سیاسیەکان بۆ تێپەڕاندن و زاڵبوون بەسەر هەڕەشە ئەمنی و سیاسی و ئابورییەکان تەوەرێکی دیکەی دیدارەکە بوو.

مەسرور بارزانی گەلی كورد خزمەتکردنی ئاوارەكان بە ئەرکێکی مرۆیی بەرز دەزانێت Msrour Barzani

مەسرور بارزانی، راوێژكاری ئه‌نجوومه‌نی ئاسایشی هه‌رێمی كوردستان رایدەگەیەنێت: "گەلی کورد لە سۆنگەی فەرهەنگی مرۆڤدۆستیی رەگداکوتاوی کۆمەڵگەی کوردستان خزمەتکردن و داڵدەدانی ئەو ئاوارانە بە ئەرکێکی مرۆیی بەرز دادەنێ، کە لە ترسی زوڵم و توندوتیژی لە ناوچەکانی دیکەی عێراق و دەوروبەرەوە پەنایان بە هەرێمی کوردستان هێناوە".

ئه‌مڕۆ چوارشەممە 12/12/2018 مه‌سرور بارزانی، راوێژكاری ئه‌نجوومه‌نی ئاسایشی هه‌رێمی كوردستان پێشوازی له‌ خاتوو بێئاتا دێمپا، وەزیری کاروباری مرۆیی کۆماری پۆڵۆنیا و شاندی یاوەری كرد، کە لە ژمارەیەک شارەزای فریاگوزاری مرۆیی و سەرۆکی رێکخراوی خێرخوازی پێکهاتبوو.

لەدیدارێکدا، کە بێئاتا پێکسا باڵیۆزی پۆڵۆنیا لە عێراق و دۆمینیک مووشاو کونسوڵی پۆڵۆنیا لە هەولێر و زیاد رەئوف نوێنەری حکوومەتی هەرێمی کوردستان لە پۆڵۆنیا ئامادەبوون، وێڕای تاوتوێکردنی پەرەسەندن و رەوشی ناوچەکە بە گشتی، جەخت لە پێویستی بە دەنگەوە هاتنی زیاتری کۆمەڵگەی نێودەوڵەتی کرایەوە و هانی رێکخراوە مرۆییەکان و دەوڵەتانی جیهان درا، کە یارمەتییە مرۆییەکانیان بۆ هەرێمی کوردستان چڕتر بکەنەوە.

مەسرور بارزانی پەیوەست بەو بابەتە تیشکی خستە سەر فەرهەنگی مرۆڤدۆستی و لێبوردەیی گەلی کورد و رایگەیاند، گەلی کورد لە سۆنگەی فەرهەنگی مرۆڤدۆستیی رەگداکوتاوی کۆمەڵگەی کوردستان خزمەتکردن و داڵدەدانی ئەو ئاوارانە بە ئەرکێکی مرۆیی بەرز دادەنێ، کە لە ترسی زوڵم و توندوتیژی لە ناوچەکانی دیکەی عێراق و دەوروبەرەوە پەنایان بە هەرێمی کوردستان هێناوە. هەر لەو دیدارەدا ئاماژەیدا بە هۆکاری رێگرییەکانی بەردەم دووبارە گەرانەوەی ئاوارەکان.

لەلای خۆیەوە وەزیری کاروباری مرۆیی پۆڵۆنیا، خۆشحاڵی خۆی بە سەردانکردنی هەرێمی کوردستان دەربڕی و هیوای سەرکەوتنی بۆ مەسرور بارزانی خواست لە بەربژێرکردنی بۆ سەرۆکایەتی حکوومەتی هەرێمی کوردستان.

دواتر وێڕای روونکردەوەی مەبەستی سەردانەکەی، پوختەیەکی لە کار و چالاکییەکان و سیاسەت و بەرنامەی وڵاتەکەی بەرامبەر کەمینە ئایینەکان و ئاوارەکان خستەڕوو، کە یارمەتیدانیانە لە شوێنی بنەڕەتی خۆیان. هەروەها حەوانەوەی ئەو ژمارە زۆرەی پەنابەرانی بەرزنرخاند و رایگەیاند، ئەوەی هەرێمی کوردستان لەبارەی شوێنی نیشتەجێ بوون و خزمەتگوزاریی سەرەتایی و پەروەردە و خوێندن بۆ ئاوارەکانی دابینکردووە، کارێکی مرۆیی گەورەیە و جێی شانازیی هەمووانە. دووپاتیشی لە هاوکاری وڵاتەکەی بۆ هەرێمی کوردستان لە بواری پێشکەشکردنی یارمەتی مرۆیی زیاتر کردەوە.

پەرەپێدان و بەردەوامیدان بە پەیوەندییە دووقۆڵیەکان و راوێژکاری لە بواری کاری مرۆیی لە نێوان هەرێمی کوردستان و کۆماری پۆڵۆنیا و رێکخراوە خێرخوازە خۆجێییەکان، تەوەرێکی دیکەی کۆبوونەوەی نێوان مەسرور بارزانی و خاتوو بێئاتا بوو.

مه‌سرور بارزانی پێشوازی له‌ ریک پێری، وەزیری وزەی ویلایەتە یەکگرتووەکانی ئەمەریکا کرد

وەزیری وزەی ویلایەتە یەکگرتووەکانی ئەمریکا خۆشحاڵی خۆی بەو پێشکەوتنانە دەربڕی، کە لە هەرێمی کوردستان بەدیهاتوون و باسی لە مەبەستی سەردانەکەی کرد، کە بۆ بەرەوپێشبردنی زیاتری پەیوەندییەکانی ئەمریکایە لەگەڵ عێراق و هەرێمی کوردستان لە بواری وزە و ئابوری، لە پەیوەست بەم بابەتەشەوە دەستپێکردنەوەی ھەناردەکردنی نەوتی کەرکووکیان لە رێگەی ھەرێمی کوردستانەوە بە سەرەتایەکی ئەرێنی ھەژمار کرد.

ئه‌مڕۆ سێشەممە 11/12/2018 مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له‌ ریک پێری، وەزیری وزەی ویلایەتە یەکگرتووەکانی ئەمریکا و شاندی یاوه‌ری كرد.

له‌ دیدارێكدا، کە دۆگلاس سیلیمان بالیۆزی ئەمریکا لە عێراق ئامادەبوو، دوا په‌ره‌سه‌ندنەکانی ناوچه‌كه‌ و پێشخستنی پەیوەندییە دووقۆڵیەکانی نێوان هەردوولا لە گشت بوارەکاندا، بەتایبەتی لە بواری وزە تاوتوێكرا.

لە سەرەتای دیدارەکە وەزیری وزەی ویلایەتە یەکگرتووەکانی ئەمریکا خۆشحاڵی خۆی بەو پێشکەوتنانە دەربڕی، کە لە هەرێمی کوردستان بەدیهاتوون و باسی لە مەبەستی سەردانەکەی کرد، کە بۆ بەرەوپێشبردنی زیاتری پەیوەندییەکانی ئەمریکایە لەگەڵ عێراق و هەرێمی کوردستان لە بواری وزە و ئابوری، لە پەیوەست بەم بابەتەشەوە دەستپێکردنەوەی ھەناردەکردنی نەوتی کەرکووکیان لە رێگەی ھەرێمی کوردستانەوە بە سەرەتایەکی ئەرێنی ھەژمار کرد.

لەلای خۆیەوە مەسرور بارزانی سوپاسگوزاری خۆی نیشاندا بەرامبەر هاوکاری و پشتیوانەکانی ئەمریکا لە شەڕی تیرۆریستانی داعش و ئاماژەی بەوەدا، درێژەدان و بەرەوپێشبردنی پەیوەندییەکان لە گشت بوارەکان لە بەرژەوەندی سەقامگیری ناوچەکە بە گشتی دایە، دووپاتی کردەوە، کە بە هاوکاری هاوبەشەکان کار بۆ کوردستانێکی بەهێزتر و پێشکەوتوو دەکەن.

ھەروەھا راوێژکاری ئەنجومەنی ئاسایش جەختی لەوە کردەوە کە ھەرێمی کوردستان دەخوازێت بە شێوەیەکی کرداری سود لە رێکەوتنی ستراتیجی نێوان ئەمەریکا و عێراق وەرگرێت بە تایبەت لە بواری کەرتەکانی وزە و ئابوری و چاکسازی.

لەبارەی دەستپێکردنی قۆناغێکی نوێ لەگەڵ بەغدا راوێژكاری ئه‌نجوومه‌نی ئاسایشی هه‌رێمی كوردستان روونیکردەوە، کە لە گفتوگۆکردن و دیالۆگ بەردەوام دەبن بۆ گەیشتن بە چارەسەری گشت کێشەکان.

تاوتوێکردنی پرسی تەواوکردنی کابینەی حکوومەتی نوێی عێراق و پێکهێنانی حکوومەتی هەرێمی کوردستان و چاکسازی و ریفۆرمی ئابووری چەند تەوەرێکی دیکەی دیدارەکەی نێوان مه‌سرور بارزانی و ریک پێری بوو.

مەسرور بارزانی و باڵیۆزی بەریتانیا لە عێراق کۆبوونەوە Masrour Barzani

مه‌سروور بارزانی: لاپەڕەیەکی تازە له‌ په‌یوه‌ندییه‌كانی نێوان هه‌ولێر و به‌غدا هه‌ڵدراوه‌ته‌وه‌

مه‌سروور بارزانی، راوێژكاری ئه‌نجوومه‌نی ئاسایشی هه‌رێمی كوردستان له‌ كۆبوونه‌وه‌یه‌كدا، لەگەڵ‌ جۆن ویڵكس باڵیۆزی به‌ریتانیا له‌ عێراق، قۆناغی نوێی په‌یوه‌ندی نێوان هه‌ولێر و به‌غدای بە هەڵدانەوەی لاپەڕەیەکی تازە لە قەڵەم دا.

ئه‌مڕۆ یەکشەممە 9ی كانوونی یه‌كه‌م/ دیسه‌مبه‌ری 2018، مه‌سروور بارزانی راوێژكاری ئه‌نجوومه‌نی ئاسایشی هه‌رێمی كوردستان پێشوازی له‌ جۆن وێڵكس باڵیۆزی به‌ریتانیا له‌ عێراق و شاندی یاوه‌ری كرد.

له‌ دیدارێكدا، كه‌ مارتن وار كونسوڵی گشتی به‌ریتانیا له‌ هه‌رێمی كوردستان ئاماده‌ی بوو، دوا په‌ره‌سه‌ندنەکانی ناوچه‌كه‌ و هەوڵ و هەنگاوەکانی  پێكهێنانی حكوومه‌تی هەرێمی کوردستان و هاتنە ئارای قۆناغی نوێی په‌یوه‌ندی نێوان هه‌ولێر و به‌غدا تاووتوێكرا.

مه‌سروور بارزانی، قۆناغی نوێی په‌یوه‌ندی نێوان هه‌ولێر و به‌غدای بە هەڵدانەوەی لاپەڕەیەکی تازە لەقەلەم دا و هیوای خواست لە ئاییندەیەکی نزیکدا بە گرتنەبەری دیالۆگ و گفتوگۆی بنیاتنەر پرسە هەڵواسراوەکان چارەسەر بکرێن و زەمینە بۆ چەسپاندنی ئاشتی و پێشخستنی وڵات و دابینکردنی خزمەتگوزارییە بنەڕەتییەکان برەخسێنێت.

باڵیۆزی بەریتانیا، وێڕای پیرۆزبایی کردن لە مەسروور بارزانی بەبۆنەی کاندیدکردنی بۆ سەرۆکایەتی حکوومەتی هەرێمی کوردستان، هیوای سەرکەوتنی بۆ خواست و جەختی لەوە کردەوە، کە وڵاتەکەیان هاوکار دەبێت بۆ ئەوەی هەرێمی كوردستان ئاوەدانی و پێشکەوتنی زیاتر بە خۆیەوە ببینێتەوە.

مه‌سروور بارزانی و ئه‌حمه‌د جه‌ربا ره‌وشی سووریا و شه‌ڕی داعش تاووتوێ ده‌كه‌ن Masrour Barzani

مه‌سروور بارزانی، راوێژكاری ئه‌نجوومه‌نی ئاسایشی هه‌رێمی كوردستان، له‌گه‌ڵ شێخ ئه‌حمه‌د جه‌ربا، سه‌رۆكی ره‌وتی ئه‌لغه‌دی سووری كۆبووه‌وه‌ و شه‌ڕ و پێكدانانه‌كانی نێوان گرووپه‌ جیاجیاكانی سووریا و رژێمی سووریا و تیرۆریستانی داعش تاووتوێ كرا.

له ‌دیداره‌كه‌دا، بارودۆخ و په‌ره‌سه‌ندنه‌ سیاسییه‌كانی ناوچه‌كه‌ و شه‌ڕ و پێكدانانه‌كانی نێوان گرووپه‌ جیاجیاكانی سووریا و رژێمی سووریا له‌لایه‌ك و تیرۆریستانی داعش و مه‌ینه‌تییه‌كانی مرۆیی و ده‌ستێوه‌ردانه‌ ده‌ره‌كییه‌كان له‌ لایه‌كی دیكه‌وه‌ گفتوگۆكرا.

شێخ ئه‌حمه‌د جه‌ربا به‌ناوی خۆی و ره‌وته‌كه‌یه‌وه‌ پیرۆزبایی له‌ مه‌سروور بارزانی كرد بۆ كاندیدكردنی وه‌ك سه‌رۆكی حكوومه‌تی هه‌رێمی كوردستان و هیوای سه‌ركه‌وتنی له‌و ئه‌ركه‌یدا بۆ خواست و دووپاتی له‌ پته‌وكردنی په‌یوه‌ندییه‌كان كرده‌وه‌.

له‌و دیداره‌دا راوێژكاری ئه‌نجوومه‌نی ئاسایشی هه‌رێمی كوردستان بیروبۆچوونی خۆی له‌مه‌ڕ پێشهات و رووداوه‌كانی ناوچه‌كه‌ به‌تایبه‌تی سوریای دراوسێ خسته‌ڕوو و هانی گشت لایه‌نه‌ په‌یوه‌ندیداره‌كانی دا تواناكانی خۆیان بخه‌نه‌گه‌ڕ بۆ دۆزینه‌وه‌ی چاره‌سه‌رێكی سیاسی بۆ دۆخه‌كه،‌ كه‌ هه‌موو لایه‌ك هه‌ست به‌ بوون و رۆڵی خۆی له‌ به‌ڕێوه‌بردنی وڵات و بڕیاره‌ سیاسیه‌كاندا بكات.

Masrour barzani مه‌سروور بارزانی: ده‌رفه‌تێك بۆ راستكردنه‌وه‌ی پرۆسه‌ی سیاسی عێراق له‌ ئارادایه‌

مه‌سروور بارزانی، راوێژكاری ئه‌نجوومه‌نی ئاسایشی هه‌رێمی كوردستان، پێشوازی له‌ هه‌ڵسووڕێنه‌ری كاروباری نووسینگه‌ی باڵیۆزخانه‌ی نه‌رویژ له‌ عێراق كرد و له‌ دیدارێكدا رایگه‌یاند، ده‌رفه‌تێك بۆ راستكردنه‌وه‌ی پرۆسه‌ی سیاسی عێراق له‌ ئارادایه‌.

مه‌سروور بارزانی، ئه‌مڕۆ چوارشه‌ممه‌ 5/12/2018  له‌ كۆبوونه‌وه‌یدا له‌گه‌ڵ روار هۆگسدال، هه‌ڵسووڕێنه‌ری كاروباری نووسینگه‌ی باڵیۆزخانه‌ی نه‌رویژ له‌ عێراق ئاماژه‌ی به‌ سه‌ردانی سه‌رۆك بارزانی بۆ به‌غدا و ئاسۆی په‌یوه‌ندییه‌كانی نێوان به‌غدا و هه‌ولێر كرد و رایگه‌یاند، ده‌رفه‌تێك بۆ راستكردنه‌وه‌ی پرۆسه‌ی سیاسی عێراق له‌ ئارادایه‌.

راوێژكاری ئه‌نجوومه‌نی ئاسایشیی هه‌رێمی كوردستان، جه‌ختی له‌وه‌ش كرده‌وه‌، كه‌ له‌و بابه‌ته‌ به‌غدا و هه‌ولێر پێویستیان به‌ یه‌كدی هه‌یه و ئاماژه‌ی به‌ فه‌رامۆشكردنی جێبه‌جێكردنی ماده‌كانی ده‌ستوور و كه‌موكوڕییه‌كانی پرۆژه‌ بودجه‌ی عێراق به‌رامبه‌ر مافه‌كانی هه‌رێمی كوردستان دا.

له‌ دیداره‌كه‌دا گفتوگۆ له‌ باره‌ی پێكهێنانی كابینه‌ی نوێی حكوومه‌تی هه‌رێمی كوردستان و پرۆسه‌ی سیاسی عێراق كرا.

له‌لای خۆیه‌وه‌ هه‌ڵسووڕێنه‌ری كاروباری نووسینگه‌ی باڵیۆزخانه‌ی نه‌رویژ له‌ عێراق سوپاسی مه‌سروور بارزانی كرد بۆ ره‌خساندنی ئه‌م ده‌رفه‌ته‌ و پیرۆزبایی به‌ربژێركردنی بۆ سه‌رۆكایه‌تی حكوومه‌تی هه‌رێمی كوردستان لێكرد و هیوای سه‌ركه‌وتن و پێشكه‌وتنی زیاتری بۆ هه‌رێمی كوردستان خواست، ئاماده‌یی وڵاته‌كه‌شی بۆ په‌ره‌پێدان و به‌رزكردنه‌وه‌ی ئاستی په‌یوه‌ندییه‌كان و فره‌وانكردنی هاوكاریی و پاڵپشتی بۆ حكوومه‌تی هه‌رێمی كوردستان نیشاندا.

هۆگسدال وێرای به‌رزنرخاندنی هاوكاری و ئاسانكارییه‌كانی هه‌رێمی كوردستانی بۆ تیمی وڵاته‌كه‌ی، پوخته‌یه‌كی له‌ كاروچالاكییه‌ مرۆییه‌كانیان و ئاسته‌نگه‌كانی به‌رده‌م پرۆسه‌ی ئاوه‌دانكردنه‌وه‌ به‌تایبه‌تی له‌ نه‌ینه‌وا خسته‌ڕوو، هه‌روه‌ها رۆڵی وڵاته‌كه‌ی له‌ هاوپه‌یمانی جیهانی دژ به‌ داعش دووپاتی كرده‌وه‌، كه‌ ئه‌وان له‌و شه‌ڕه‌دا به‌رده‌وام ده‌بن.

مەسروور بارزانی: دەرفەتێكی نوێ بۆ چارەسەركردنی كێشەكانی ھەولێر و بەغدا ھاتووەتە ئاراوە

مه‌سروور بارزانی، راوێژكاری ئه‌نجوومه‌نی ئاسایشی هه‌رێمی كوردستان رایگەیاند، ده‌رفه‌تێكی نوێ هاتووەته‌ پێش بۆ هه‌ڵدانه‌وه‌ی لاپه‌ڕه‌یه‌كی نوێی په‌یوه‌ندی و چاره‌سه‌ركردنی گشت كێشه‌كانی نێوان به‌غدا و هه‌ولێر.

ئه‌مڕۆ سێشه‌ممه‌ 4/12/2018 مه‌سروور بارزانی راوێژكاری ئه‌نجوومه‌نی ئاسایشی هه‌رێمی كوردستان، پێشوازی له‌ یان كۆبیچ نوێنه‌ری تایبه‌تی سكرتێری گشتی رێكخراوی نه‌ته‌وه‌یه‌كگرتووه‌كان له‌ عێراق كرد، كه‌ به‌بۆنه‌ی كۆتایهاتنی ئه‌ركه‌كه‌ی له‌ عێراق سه‌ردانی كردبوو.

 له‌ دیدارێكدا مه‌سروور بارزانی، هه‌وڵه‌كانی یان كۆبیچی  له‌ لێكنزیككردنه‌وه‌ی هێز و لایه‌نه‌كانی عێراق به‌رزنرخاند و هیوای سه‌ركه‌وتنی له‌ ئه‌ركی داهاتوو بۆ خواست. هه‌ر له‌و دیداره‌دا تیشكخرایه‌ سه‌ر پرۆسه‌ی سیاسی عێراق، له‌وباره‌وه‌ راوێژكاری ئه‌نجوومه‌نی ئاسایشی هه‌رێمی كوردستان رایگه‌یاند، پێمانوایه‌ ده‌رفه‌تێكی نوێ هاتۆته‌ پێش بۆ هه‌ڵدانه‌وه‌ی لاپه‌ڕه‌یه‌كی نوێی په‌یوه‌ندی و چاره‌سه‌ركردنی گشت كێشه‌كانی نێوان به‌غدا و هه‌ولێر، دووپاتی له‌ پشتگیری هه‌رێمی كوردستان بۆ هه‌نگاوه‌كانی سه‌رۆك وه‌زیران و پێكه‌وه‌كاركردن كرده‌وه‌‌.

له‌لای خۆیه‌وه‌ نوێنه‌ری تایبه‌تی سكرتێری گشتی رێكخراوی نه‌ته‌وه‌یه‌كگرتووه‌كان له‌ عێراق سوپاسی مه‌سروور بارزانی كرد بۆ پێشكه‌شكردنی رێنوێنی و هاوكاری و ئاسانكارییه‌كان. هه‌روه‌ها خۆشحاڵی خۆی به‌ بڕیاری ده‌ستنیشانكردنی مه‌سروور بارزانی بۆ سه‌رۆكایه‌تی كردنی كابینه‌ی نوێی حكوومه‌تی هه‌رێمی كوردستان ده‌ربڕی و هیوای سه‌ركه‌وتنی له‌و ئه‌ركه‌ بۆ خواست، هاوكات دووپاتی كرده‌وه‌، كه‌ كاری له‌ پێشینه‌ی نه‌ته‌وه‌ یه‌كگرتووه‌كان له‌ عێراق هاوكاریكردنی چاره‌سه‌ركردنی كێشه‌كانی نێوان به‌غدا و هه‌ولێره‌، به‌تایبه‌تی كێشه‌كانی په‌یوه‌ست به‌ مادده‌ی 140ی ده‌ستوور و ئاماژه‌ی به‌وه‌دا، كه‌ نوێنه‌رایه‌تی نه‌ته‌وه‌ یه‌كگرتووه‌كان له‌سه‌ر ئه‌و بابه‌ته‌ له‌ ئه‌ركی خۆی به‌رده‌وام ده‌بێت.

پێشهات و هه‌ڵسه‌نگاندنی ئه‌گه‌ره‌كان و ره‌وشی سیاسی و ئابووری ناوچه‌كه‌ ته‌وه‌رێكی دیكه‌ی دیداره‌كه‌ی نێوان هه‌ردوولا بوو.