رۆڵی هه‌رێمی كوردستان له‌شه‌ڕی دژ به‌تیرۆریستانی داعش سه‌ره‌كی و كاریگه‌ره
ئه‌مڕۆ 4/5/2016 (مه‌سرور بارزانی) راوێژكاری ئه‌نجوومه‌نی ئاسایشی هه‌رێمی كوردستان له‌میانه‌ی پێشوازیكردنی له‌سێنا‌تۆر (ماركۆ روبیۆ) ئه‌ندامی كۆنگرێسی ئه‌مریكا و یه‌كێك له كاندیدانی پارتی كۆماری بوو بۆ هه‌ڵبژاردنی ساڵی 2016ی سه‌رۆكایه‌تی رایگه‌یاند، " ئێمه ئه‌وه‌ی له‌تواناماندا بوو بۆ هێشتنه‌وه‌ی وڵات به‌پێكه‌وه‌یی و هاوبه‌شی كردمان، به‌ڵام ئێستا عێراق به‌كرده‌وه‌دابه‌ش بووه."
له‌و دیداره‌دا، كه(ماتیاس میتمان) كونسوڵی گشتی ئه‌مریكا له‌هه‌ولێر ئاماده‌یبوو، شه‌ڕی دژ به‌تیرۆریستانی داعش و ئاماده‌كارییه‌كانی ئۆپه‌راسیۆنی رزگاركردنی مووسڵ و رێوشوێنه‌كانی هاوكاری زیاتری نێوان ویلایه‌ته‌یه‌كگرتووه‌كانی ئه‌مریكا و هه‌رێمی كوردستان تاوتوكرا. سێنا‌تۆر (ماركۆ) دووپاتی له‌رۆڵی هه‌رێمی كوردستان له‌شه‌ڕی دژ به‌تیرۆریستانی داعش و تیرۆریزمی جیهانی به‌شێوه‌یه‌كی گشتی كرده‌وه‌و رایگه‌یاند، كه"رۆڵێكی سه‌ره‌كی و كاریگه‌ره."
هه‌ر له‌و دیداره‌دا، هه‌ردوولا گفتوگۆیان له‌باره‌ی بزاوته‌سیاسی و كۆمه‌ڵایه‌تییه‌كان و ئاسته‌نگه‌كانی به‌رده‌م رێككه‌وتنێكی سیاسی گشتگیر له‌نێوان پێكهاته‌كانی مووسڵ دوای رزگاركردنی كرد و مه‌سرور بارزانی جارێكی دیكه‌تیشكی خسته‌سه‌ر پێویستی دابینكردنی یارمه‌تییه‌سه‌ربازی و دارییه‌كان بۆ هێزه‌كانی پێشمه‌رگه‌و رایگه‌یاند، "ئێمه‌پێمانوایه‌ده‌بێ بۆ ئه‌م ئۆپه‌راسیۆنه‌هێزه‌كانی پێشمه‌رگه‌ش وه‌كو سوپای عێراق پڕ چه‌ك بكرێن"
له‌به‌شێكی دیكه‌ی دیداره‌كه‌دا ئاماژه‌به‌ناكۆكییه‌مێژوویی و تایفییه‌كانی نێوان پێكهاته‌كانی عێراق درا و مه‌سرور بارزانی رایگه‌یاند،" عه‌قڵیه‌تێك له‌به‌غدا هه‌یه، هاوبه‌شی قبوڵ نییه، ئێمه‌ئه‌وه‌ی له‌تواناماندا بوو بۆ هێشتنه‌وه‌ی وڵات به‌پێكه‌وه‌یی و هاوبه‌شی كردمان، به‌ڵام ئێستا عێراق به‌كرده‌وه دابه‌ش بووه"
له‌به‌شێكی دیكه‌ی دیداره‌كه‌دا تیشكخرایه‌سه‌ر دوا هێرشی به‌رفره‌وانی تیرۆریستانی داعش دژ به‌سه‌نگه‌ره‌كانی پێشمه‌رگه‌له‌میحوه‌ری ته‌لسقۆف و گیان له‌ده‌ستدانی سه‌ربازێكی ئه‌مریكا، كه‌له‌و محوه‌ره‌دا هاوكاری پێشمه‌رگه‌ی ده‌كرد، له‌و باره‌وه‌مه‌سرور بارزانی رایگه‌یاند، ئێمه‌به‌یه‌كه‌وه‌خوێنمان به‌خشی و په‌یوه‌ندی مێژوویی نێوان هه‌ردوو وڵات به‌رز ده‌نرخێنین و خوازیاری پته‌وتركردن و به‌رده‌وامی ئه‌م دۆستایه‌تییه‌ن.
