لە میانی دیدارێكیاندا لەگەڵ باڵیۆزی رووسیا لە عێراق، مه‌سرور بارزانی، راوێژکاری ئەنجوومەنی ئاسایشی هەرێمی کوردستان رایگەیاند، خواستی هەرێمی کوردستان پابه‌ندبوون و جێبەجێکردنی دەستوورە، وه‌ك رێگه‌چاره‌ی به‌دیهێنانی سه‌قامگیری لە عێراق.
ئەمرۆ 10/4/2018 مەسرور بارزانی، راوێژکاری ئەنجوومەنی ئاسایشی هەرێمی کوردستان پێشوازی لە مه‌كسیم ماكسیمۆڤ، باڵیۆزی رووسیا لە عێراق و شاندی یاوه‌ری کرد. لە دیدارێكدا، كه به ئاماده‌بوونی ڤیكتۆر سیماكۆڤ، كونسوڵی گشتی رووسیا له هه‌ولێر به‌ڕێوه‌چوو، بیروڕا له‌باره‌ی په‌ره‌سه‌ندنه سیاسی و ئه‌منیه‌كانی ناوچه‌كه ئالۆگۆڕكرا و هەردوولا جەختیان لە سەر پەرەپێدانی پەیوەندییەکانی هەرێمی كوردستان و رووسیا له گشت بواره‌كان کردەوە.
لە بارەی هه‌وڵه‌كانی چاره‌سه‌ركردنی كێشه و گرفته‌كان و دانووستانەکانی نێوان هەولێر و بەغدا، باڵیۆزی رووسیا خۆشحاڵیی خۆی بۆ پێشکەوتنی دانوستانەکانی نێوان هەردوولا دەربڕی و ئاواتی خواست هەڵبژاردنەکانی عێراق و هەرێم بە سەرکەتوویی بەڕێوە بچن و ببن بە دەسپێکی قۆناخێکی نوێ بۆ چارەسەری گشت کێشەکان.
پەیوەند بەم بابەتەوە راوێژکاری ئەنجوومەنی ئاسایشی هەرێمی کوردستان ئاماژەی بە هه‌ڵبژاردنه‌كان و هه‌نگاوه‌كانی دواتر كرد، کە وه‌ك هه‌رێمی كوردستان ڤیتۆیان له‌سه‌ر هیچ لیست و لایه‌نێك نییه و جه‌ختی له گرینگی رێزگرتن و پابه‌ندبوون به ده‌ستوور و هاوبه‌شی راسته‌قینه كرده‌وه و رایگه‌یاند، پێویستە هەوڵبدرێت دۆخی عێراق بە جۆرێك ئاسایی بکرێتەوە کە گشت پێکهاتەکان هەست بە دڵنیایی بکەن و دووپاتی کردەوە کە خواستی هەرێمی کوردستان پابه‌ندبوون و جێبەجێکردنی دەستوورە، وه‌ك رێگه‌چاره‌ی به‌دیهێنانی سه‌قامگیری.
لە بارەی جەنگی دژەتیرۆرەوە راوێژکاری ئەنجوومەنی ئاسایشی هەرێم ئاماژه‌ی به‌وه‌دا، كه هێشتا هەڕەشەی تیرۆریستان لە ناوچەکەدا ماوە و به‌م دواییه‌ش چالاكییه‌كانیان له هه‌ندێ ناوچه په‌ره‌ی سه‌ندووه.
No comments:
Post a Comment